Մարդկանց համար եկել է վճռական պահը: Այս մասին Կապանում կայացած հանրահավաքում հայտարարեց պաշտպանության նախկին նախարար, «Հայաստան» դաշինքի ներկայացուցիչ, գեներալ-գնդապետ Սեյրան Օհանյանը:

«Ես ուզում եմ սկսել Ռոբերտ Քոչարյանին մեջբերելով: Մի ասացվածք կա՝ վատ է այն զինվորը, որը չի երազում գեներալ դառնալ: Մի անգամ երկրորդ նախագահը ավելացրեց (գուցե ինքն էլ չի հիշում), որ վատ է այն գեներալը, որը դադարում է հոգով զինվոր լինել:

Մեր թիմում յուրաքանչյուրը գիտի իր գործը, յուրաքանչյուրը ե՛ւ գեներալ է, ե՛ւ զինվոր: Թեւքերը քշտելով՝ մենք պատրաստ ենք աշխատել հանուն Հայաստանի ապագայի: Մենք գիտենք, թե ինչը հանգեցրեց պարտության եւ ճգնաժամի: Անգրագետ, անփորձ, ապաշնորհ ու մանրախնդիր իշխանությունը:

Մանրախնդիր առաջնորդներ, որոնց համար չկա ռազմավարություն, այլ միայն իրենց մանր շահերը: Մեր թիմում բոլորը փորձառու են: 10 տարի մենք եզրակացություններ ենք արել մեր աշխատանքից: Եւ իշխանությունների գործողությունների փորձից մենք տեսանք, թե որքան հեշտ է կարճ ժամանակում քանդել այն, ինչ կառուցվել է տարիներով: Բայց ես վստահ եմ, որ մենք կվերականգնենք հայկական բանակի փառքը: Բարեփոխումներն ու վերազինումը կլինեն մեր ուշադրության կենտրոնում»,- ասաց Օհանյանը: