Երկօրյա աշխատանքային այցի ընթացքում Հայաստանի եւ  ԼՂՀ  ԴԱՀԿ ծառայությունների ղեկավարների միջեւ հունիսի 29-ին Ստեփանակերտում ստորագրվել է «Փոխադարձ իրավական օգնության մասին» հուշագիր։

ԴԱՀԿ մամուլի ծառայությունից NEWS.am-ին հայտնում են, որ մինչ հուշագրի ստորագրումը, ԼՂՀ  գլխավոր հարկադիր կատարող Սամվել Շահրամանյանը հուշագիրը նոր շունչ ու լիցք է տվել արցախյան կառույցին, համաձայն որի մշակվել եւ հաստատվել է 2010-2011թթ. համագործակցության ծրագիրը։ Արդյունքում ԼՂՀ  ԴԱՀԿ ծառայությունում ներդրվել եւ կիրառվում է էլեկտրոնային հաշվառման համակարգը եւ ստեղծվել է կայքէջ։

ՀՀ գլխավոր հարկադիր կատարող Միհրան Պողոսյանն իր հերթին նշել է. «Մեզ համար   ուրախալի է, որ տեղեկատվական տեխնոլոգիաների ներդրումն իր դրական արդյունքն է տվել ԼՂՀ ԴԱՀԿ-ում։ Այսօր, փաստորեն, անցնում ենք համագործակցության 2-րդ փուլ, որով, ինչպես նշվեց, իրավական փոփոխություններ են նախատեսվում։ Վարույթի փոխանցում, պարտապանի եւ նրա գույքի հետախուզում. սրանք հարցեր են, որոնք պետք է ամրագրվեն համագործակցութան շրջանակներում, ինչն էլ այսօր արվում է»։

Այն, որ գործընթացն իրականացվում է ջերմ մթնոլորտում, ինքնին հաջողության գրավական է։ ՀՀ  գլխավոր հարկադիր կատարողի խոսքերով՝ անելիքները շատ են եւ պետք է փորձենք նոր մեխանիզմներ գտնել, մարդկային գործոնը հնարավորինս նվազեցնել՝ բարձրացնելով բռնագանձումների մակարդակը։ 

Նույն օրը հայաստանյան պատվիրակությունը եղել է ԼՂՀ պաշտպանության բանակի զորամասերում, հանդիպումներ ունեցել սպայակազմի եւ զինվորների հետ։  Միհրան Պողոսյանը ՀՀ ԱՆ ԴԱՀԿ ծառայության կողմից  զորամասերին է նվիրել համակարգչային եւ կենցաղային տեխնիկա։