ԱՄՆ պետքարտուղար Էնթոնի Բլինքենը հայտարարել է, որ Միացյալ Նահանգներն ամենայն հավանականությամբ չեն պահպանի դիվանագիտական ներկայությունն Աֆղանստանում սեպտեմբերի 1-ից, սակայն այն մարդկանց տարհանումը, որոնք ցանկանում են հեռանալ երկրից զորքերի դուրս բերման ժամկետի լրանալուց հետո, միեւնույն է կիրականացվի, հաղորդում է The Washington Examiner-ը:

Մամուլի հետ հանդիպման ժամանակ Բլինքենը հանդես է եկել քննադատների դեմ, որոնք պնդել են, որ Բայդենի վարչակազմը վտանգի է ենթարկել ամերիկացիների ու դաշնակիցների անվատնգությունը տարհանման ժամանակ:

«Այդ աշխատանքի համար վերջնաժամկետ չկա: Եւ մենք ունենք միջոցներ, մենք ունենք մեխանիզմներ, որոնք կօգնեն թեթեւացնել մարդկանց տարհանումն Աֆղանստանից, եթե նրանք որոշեն հեռանալ»,-նշել է պետքարտուղարը:

Բլինքենը նաեւ հայտարարել է, որ առաջիկայում Քաբուլի օդանավակայանում նոր ահաբեկչությունների վտանգը շատ մեծ է:

«Վերջին մի քանի օրերն ամենավտանգավորն են առանց այն էլ վտանգավոր առաքելության գործում: Ուստի մենք անում են հնարավորինս ամեն ինչ մարդկանց անվտանգությունն ապահովելու համար: Սակայն ռիսկը շատ մեծ է»,-ասել է նա: