նախընտրելի դարձնել
Լեհ-բելառուսական սահմանին միգրացիոն ճգնաժամին «Աերոֆլոտ»-ի ներգրավվածության մասին Վարշավայի հայտարարությունը ճիշտ չէ։ Այս մասին մամուլի ասուլիսի ժամանակ հայտարարել է ՌԴ ԱԳ նախարար Սերգեյ Լավրովը, փոխանցում է ՏԱՍՍ-ը։
«Եթե շատ դիվանագիտորեն խոսենք, ապա դա ճիշտ չէ։ Իսկ «Աերոֆլոտ»-ը, որքան գիտեմ, Բելառուսի Հանրապետության մայրաքաղաք չի թռչում եւ չի իրականացնում չվերթներ այն երկրների մայրաքաղաքների միջեւ, որտեղից փախստականների հոսք կա դեպի Եվրոպա այն բանից հետո, երբ Եվրոպան եւ Ամերիկան ռմբակոծեցին այդ երկրները»,-ասել է Լավրովը՝ մեկնաբանելով լեհ-բելառուսական սահմանին միգրացիոն ճգնաժամին «Աերոֆլոտ»-ի ներգրավվածության մասին Վարշավայի հայտարարությունը։
«Աերոֆլոտն» ավելի վաղ հերքել է Բելառուսի եւ Լեհաստանի սահմանին տիրող իրավիճակին առնչություն ունենալու մեղադրանքները՝ նշելով, որ թռիչքներ չի իրականացնում դեպի Իրաքի եւ Սիրիայի քաղաքներ։ Միգրացիոն ճգնաժամը Բելառուսի, Լեհաստանի, Լիտվայի եւ Լատվիայի հետ սահմաններին, ուր տարեսկզբից ներգաղթյալներ են շտապում, կտրուկ սրվել է նոյեմբերի 8-ին։ Մի քանի հազար մարդ բելառուսական կողմից ժամանել է Լեհաստանի սահման ու չի լքել սահմանային գոտին, նրանցից ոմանք փորձել են մտնել Լեհաստանի տարածք՝ կոտրելով փշալարերը։ ԵՄ երկրները մեղադրում են Մինսկին ճգնաժամը միտումնավոր սրելու մեջ եւ կոչ են անում պատժամիջոցներ սահմանել երկրի դեմ։ Բելառուսի նախագահ Ալեքսանդր Լուկաշենկոն ասել է, որ ստեղծված իրավիճակի մեղավորը արեւմտյան պետություններն են, որոնց գործողությունների պատճառով մարդիկ փախչում են պատերազմից։
