նախընտրելի դարձնել
Մեր դաշնակիցները միակարծիք են, որ մենք չպետք է ՆԱՏՕ-ի զորքեր եւ ինքնաթիռներ ուղարկենք Ուկրաինա։ Այս մասին մամուլի ասուլիսում ասել է ՆԱՏՕ-ի գլխավոր քարտուղար Յենս Սթոլթենբերգը՝ պատասխանելով The Irish Times-ի լրագրողի հարցին, թե ինչ է պատրաստ անել ՆԱՏՕ-ն ռուսական զորքերին Ուկրաինայից դուրս մղելու համար։
«Ես ակնկալում եմ, որ քննարկում կլինի այն մասին, թե ինչպես կարելի է հետագա ռազմական աջակցություն ցուցաբերել, ինչպես կարող ենք թույլ տալ ուկրաինացիներին դիմակայել ներխուժող ռուսական զորքերին։ Նրանք հյուսիսից հեռանում են Կիեւից, որպեսզի վերախմբավորվեն եւ շարժվեն դեպի արեւելք»,- ասել է նա:
«Բայց միեւնույն ժամանակ մեր դաշնակիցները համաձայն են, որ մենք չպետք է ՆԱՏՕ-ի զորքեր ուղարկենք Ուկրաինա։ Եվ մենք չպետք է ՆԱՏՕ-ի ինքնաթիռներ ուղարկենք Ուկրաինայի օդային տարածք։ Եվ դա այն պատճառով, որ մենք նաեւ պատասխանատվություն ենք կրում Ռուսաստանի եւ ՆԱՏՕ-ի միջեւ պատերազմը կանխելու համար։ Սա կբերի ավելի շատ մահ, ավելի շատ ավերածություններ եւ նույնիսկ ավելի մեծ վտանգ: Այսպիսով, մենք կքննարկենք, թե ինչպես կարող ենք հետագա աջակցություն ցուցաբերել, էլ ինչ կարող ենք անել Ուկրաինային աջակցելու համար, այդ թվում՝ ինչ ծախսեր, հավելյալ ծախսեր կարող ենք պարտադրել Ռուսաստանին։ Ես ողջունում եմ, որ դաշնակիցները քննարկում են լրացուցիչ պատժամիջոցները, բայց ես չեմ ակնկալում, որ դաշնակիցներից որեւէ մեկը հանդես կգա Ուկրաինա ՆԱՏՕ-ի զորքեր ուղարկելու օգտին»,- հավելել է Սթոլթենբերգը։
