Հայաստանում տուգանված գազալցակայաններում թերլցումների մասին ցուցանակներ կփակցվեն վարորդին տեսանելի տեղում։ Այս մասին ԱԺ նիստում Վարչական իրավախախտումների մասին օրենսգրքում փոփոխություններ եւ լրացումներ կատարելու մասին օրենքի նախագծերի փաթեթի քննարկման ժամանակ հայտարարեց ՔՊ-ական պատգամավոր Ծովինար Վարդանյանը։ 

Փոփոխությունը, ըստ պատգամավորի, ավելի շատ կանխարգելիչ բնույթ է կրելու։ Նման պատիժը հաշվի առնելով՝ տնտեսվարող սուբյեկտները, ըստ պատգամավորի, ավելի զգոն կլինեն։

«Այս նախաձեռնության շուրջ քննարկումներ են եղել եւ՛ կառավարության, եւ՛ գործարարների հետ, որոնք դրական են արձագանքել առաջարկվող փոփոխություններին»,-ասաց պատգամավորը։

Ցուցանակը փակցվելու է մեկ ամիս ժամկետով, իսկ դիտավորյալ հանելը կպատժվի տուգանքով։ 

«Սա հանրային վերահսկողության գործիք է, որի օգնությամբ հաճախորդները կկարողանան ամբողջական եւ հավաստի տեղեկատվություն ստանալ կոնկրետ ձեռնարկատիրոջ գործունեության մասին»,-պարզաբանեց Վարդանյանը։

Բացի այդ, գործող կանոնակարգով թերլցման արդյունքում առաջացող տուգանքը կազմում է մոտ 500 հազար դրամ։ Այս առումով առաջարկվել է ավելի համամասնական սկզբունք սահմանել։  Այսպիսով, խախտման օրվան նախորդող կոնկրետ այս եռամսյակի համար կսահմանվի հաստատագրված տուգանք՝ 200 հազար դրամի չափով եւ ընդհանուր շրջանառության 0,5 տոկոսի չափով։

Իր հերթին, վարչապետի աշխատակազմի Տեսչական մարմինների աշխատանքների համակարգման գրասենյակի ղեկավար Արթուր Ասոյանը նշեց, որ կառավարության նախնական դիրքորոշումն այս նախագծի վերաբերյալ բավականին դրական է։ Նա տեղեկացրեց նաեւ, որ 2022 թվականի առաջին կիսամյակում իրականացվել է 80 ստուգում եւ թերլցման 5 խախտում է հայտնաբերվել։

Համեմատաբար կարճ քննարկումից  հետո օրենսդրական նախաձեռնությունը դրական եզրակացություն ստացավ խորհրդարանական հանձնաժողովի կողմից։