նախընտրելի դարձնել
Հայաստանում ցեմենտի կլինկերի տուրքը պետք է չեղարկվի։ Այս մասին Ազգային ժողովի նիստում սեպտեմբերի 12-ին, «Պետական տուրքի մասին» օրենքում փոփոխություններ կատարելու մասին օրինագծի քննարկման ժամանակ, ասել է օրենսդրական նախաձեռնության հեղինակներից մեկը՝ կառավարող «Քաղաքացիական պայմանագիր» խմբակցության պատգամավոր Բաբկեն Թունյանը։
Պատգամավորը նշել է, որ ցեմենտի ներմուծման տուրքը պետք է իջեցվի՝ մեկ տոննան 14 000 դրամից հասցվելով 9 000-ի։ Նրա խոսքով՝ տուրքի բարձրացումը նպատակ ուներ պաշտպանել տեղական արտադրողների շահերն ու իրավունքները։ Վերջինները պարզապես չկարողացան մրցակցել իրանական արտադրողների հետ, հատկապես վերջնական գնի հարցում։ Իրանական ցեմենտը եւ կլինկերը ըստ էության ավելի էժան էին, հետեւաբար՝ ավելի հասանելի հայ սպառողներին։ Եվ դա՝ չնայած տեղափոխման, տուրքերի վճարման ծախսերին։ Ուստի, Հայաստանի իշխանությունները 2019թ. որոշեցին էապես բարձրացնել երկիր արտասահմանյան արտադրության ցեմենտի եւ կլինկերի ներմուծման տուրքը։ Այնուամենայնիվ, որոշ ժամանակ անց դա հանգեցրեց նշյալ ապրանքի դեֆիցիտի։ Արդյունքում՝ դրա արժեքը շուկայում էապես բարձրացավ։
«Փոփոխությունները պայմանավորված են տեղի արտադրողին պաշտպանելու անհրաժեշտությամբ։ Դրանք ուղղված են նաեւ ցեմենտ արտադրողների եւ ներմուծողների համար հավասար պայմանների ապահովմանը։ Բացի այդ, փոփոխությունները կարող են վերականգնել հավասարակշռությունը, ինչպես նաեւ կանխել շուկայի հետագա կոնցենտրացիան եւ գների չհիմնավորված աճը»,- ասել է Թունյանը։
Նա նաեւ տեղեկացրել է, որ վերջին տարիներին իրանական ցեմենտի ներմուծման ծավալները կրճատվել են՝ 25-ից հասնելով 5 տոկոսի։
Այսպիսով, վերը նշվածը հաշվի առնելով՝ խորհրդարանականն առաջարկել է լրիվ չեղարկել ցեմենտի կլինկերի տուրքը, իսկ ցեմենտի ներմուծման տուրքը իջեցնել՝ մեկ տոննան 14 000-ից 9 000-ի։ Թունյանի հավաստիացմամբ՝ այսպիսի առաջարկությամբ հանդես են եկել ե՛ւ շինարարական ընկերությունները, ե՛ւ հասարակական կազմակերպությունները, որոնք ներկայացնում են նրանց շահերը։
Պատգամավոր Սերգեյ Բագրատյանի կարծիքով՝ նշված միջոցները բավարար չեն լինի։ Նրա կարծիքով՝ սկզբում հարկավոր է ստանալ շուկայի վիճակի մասին ստույգ տվյալներ։
«Դա մեզ անհրաժեշտ է ճիշտ որոշում կայացնելու համար։ Մենք պետք է շուկայում մրցակցություն ստեղծենք։ Առանց մրցակցության ձեւավորվում եւ պարտադրվում են գներ, որոնք առաջ են բերում մեր շինարարների դժգոհությունը... Եթե մենք հավասար եւ բնական մրցակցություն ապահովելու հնարավորություն չունենք, իրանական ցեմենտը Հայաստան չի գա։ Եվ դա բնական է»,- նշել է Բագրատյանը։
