նախընտրելի դարձնել
Ֆրանսիան հաջորդ տարի տնային տնտեսությունների համար էլեկտրաէներգիայի եւ գազի գները 15 տոկոսի մակարդակում կսահմանափակի՝ Եվրոպայի վերջին տասնամյակների ամենածանր էներգետիկ ճգնաժամից սպառողների ցավը թեթեւացնելու համար: Այս մասին հայտարարել է վարչապետ Էլիզաբեթ Բորնը, հայտնում է Reuters-ը։
Սահմանափակումները պետության համար կարժենան 16 միլիարդ եվրո եւ կկանխեն տնային տնտեսությունների հաշիվների ավելի քան երկու անգամ ավելացումը: Պետությունը կշարունակի նաեւ մինչեւ 200 եվրո սուբսիդիաներ տրամադրել ամենաաղքատներին՝ 12 միլիոն տնային տնտեսություններին:
Բորնը հայտնել է, որ գազի գնի նոր սահմանափակումը ուժի մեջ կմտնի հունվարին, իսկ էլեկտրաէներգիայինը՝ մեկ ամսից:
«Մենք, ինչպես եւ մեր առջեւ ծառացած ճգնաժամի սկզբում, լի ենք գործելու, հարմարվելու եւ ֆրանսիացի ժողովրդին ու մեր տնտեսությունը պաշտպանելու վճռականությամբ»,- ասել է Բորնը:
Ֆրանսիան արդեն միլիարդավոր եվրոներ է ծախսել շուկայում էներգիայի բարձր գների ինֆլյացիոն ազդեցությունը մեղմելու միջոցառումների վրա։
Նա էլեկտրաէներգիայի կարգավորվող գների աճն այս տարի սահմանափակել է 4 տոկոսի մակարդակում եւ ստիպել է պետական կոմունալ EDF ընկերությանը ավելի շատ էլեկտրաէներգիա վաճառել մրցակիցներին՝ շուկայականից շատ ցածր գներով: Նա նաեւ սառեցրել է կենցաղային գազի կարգավորվող գները 2021 թվականի հոկտեմբերի մակարդակում։
Կառավարությունը կանխատեսում է, որ գազով ջեռուցվող տնային տնտեսությունները 2023 թվականին ամեն ամիս միջինը 25 եվրոյով ավելի կվճարեն՝ լրացուցիչ 200 եվրոյի փոխարեն։
Կառավարության ռազմավարության կողմնակիցները մատնանշում են Ֆրանսիայում գնաճի մակարդակը, որն օգոստոսին ամենացածրն է եղել Եվրամիությունում եւ կազմել է 6,5 տոկոս: Որոշ քննադատներ ասում են, որ սահմանափակումներն անկայուն են եւ հետագայում կհանգեցնեն ֆինանսական կորուստների:
