Ճապոնիայի կառավարությունը Մեծ Տոկիոյից հեռացող ընտանիքներին յուրաքանչյուր երեխայի համար 1 մլն իեն (7 500 ԱՄՆ դոլար) է առաջարկում։

Ճապոնական ԶԼՄ-ները հաղորդում են, որ խթանը՝  300 000 իենի չափով տեղափոխման նախկին վճարի համեմատ կտրուկ աճը, կներդրվի ապրիլին։

Չնայած նրան, որ անցած տարի Տոկիոյի բնակչությունն առաջին անգամ նվազել է (այս միտումը մասամբ պայմանավորված է կորոնավիրուսային համավարակով), քաղաքական գործիչները կարծում են, որ ավելին պետք է արվի քաղաքի բնակչության խտությունը նվազեցնելու եւ մարդկանց խրախուսելու համար նոր կյանք սկսել երկրի «ոչ նորաձեւ» տարածքներում, որոնք տուժել են ծերացումից, բնակչության կրճատումից եւ երիտասարդների միգրացիայից դեպի Տոկիո, Օսակա եւ այլ խոշոր քաղաքներ:

Վճարումները՝ ի լրումն արդեն գոյություն ունեցող մինչեւ 3 մլն իենի չափով ֆինանսական աջակցության, կառաջարկվեն Տոկիոյի 23 հիմնական շրջաններում եւ հարեւան Սայտամայի, Չիբայի եւ Կանագավայի պրեֆեկտուրաներում բնակվող ընտանիքներին:

Նպաստ ստանալու համար ընտանիքները պետք է տեղափոխվեն Տոկիոյի սահմաններից դուրս։ Ոմանք կարող են գումար ստանալ, եթե տեղափոխվեն քաղաքի սահմաններում գտնվող լեռնային շրջաններ, հաղորդում է Kyodo-ն։

Մոտ 1300 քաղաքապետարաններ՝ ընդհանուրի մոտավորապես 80 տոկոսը, միացել են այս սխեմային՝ հույս ունենալով օգուտ քաղել բնակչության կյանքի որակի նկատմամբ վերաբերմունքի փոփոխությունից, որն ուժեղացել է համավարակի ժամանակ, երբ ավելի շատ աշխատողներ անցել են հեռավար աշխատանքի։

Այնուամենայնիվ, ընտանիքներին, որոնք հույս ունեն «հեշտ գումար» ստանալ նախքան մայրաքաղաք վերադառնալը, հիասթափություն է սպասվում։  Նրանք պետք է առնվազն հինգ տարի ապրեն նոր տներում, եւ ընտանիքի անդամներից մեկը պետք է աշխատի կամ պլանավորի նոր բիզնես հիմնել: Նրանք, ովքեր կտեղափոխվեն մինչեւ հինգ տարին լրանալը, ստիպված կլինեն վերադարձնել գումարը:

Պաշտոնյաները հույս ունեն, որ առաջարկվող առատաձեռն գումարները կխրախուսեն մինչեւ 18 տարեկան երեխաներ ունեցող ընտանիքներին վերակենդանացնել թաղամասերը եւ թուլացնել ճնշումը տարածության եւ հանրային ծառայությունների վրա Տոկիոյում՝ աշխարհի ամենամեծ մեգապոլիսում, որի բնակչությունը կազմում է մոտ 35 միլիոն մարդ:   

Ըստ էության, տեղափոխվող ընտանիքները ստանում են 1-3 միլիոն իեն մեկ ընտանիքի համար, պայմանով, որ նրանք բավարարում են երեք չափանիշներից մեկը. նրանք աշխատում են փոքր կամ միջին ընկերությունում այն տարածքում, որտեղ նրանք տեղափոխվում են, շարունակում են աշխատել նույն տեղում ՝ օգտագործելով հեռավար աշխատանքը կամ նոր տանը բիզնես են հիմնում՝ համաձայն Nikkei թերթի։

Գումարի կեսը կտրամադրվի կենտրոնական կառավարության կողմից, իսկ մյուս կեսը կտրամադրվի տեղական քաղաքապետարանների կողմից, հաղորդում է Kyodo-ն:

Կառավարությունը հույս ունի, որ մինչեւ 2027 թվականը Տոկիոյից 10 000 մարդ կտեղափոխվի գյուղական տարածք, հավելում է թերթը։