նախընտրելի դարձնելՀայաստանի կառավարությունում այսօր` սեպտեմբերի 15-ին, տեղի է ունեցել ՀՀ անկախության 20-ամյակին նվիրված միջոցառումների նախապատրաստման եւ կազմակերպման պետական հանձնաժողովի նիստը, որը վարել է վարչապետ, հանձնաժողովի նախագահ Տիգրան Սարգսյանը:
Կառավարության մամուլի ծառայությունից NEWS.am-ին հայտնում են, որ նիստի ժամանակ ՀՀ նախագահի աշխատակազմի ղեկավարի տեղակալ, տոնական միջոցառումների համակարգող Վիգեն Սարգսյանը նշել է, որ տոնական միջոցառումների կազմակերպման աշխատանքներն ընթացքի մեջ են՝ ըստ սահմանված ժամանակացույցի:
Մասնավորապես, սեպտեմբերի 21-ին Հանրապետության հրապարակում տեղի կունենա տոնական զորահանդես, իսկ երեկոյան՝ դասական երաժշտության համերգ՝ ձայնային եւ լուսային ժամանակակից լուծումներով: ՀՀ անկախության օրը «Հայաստանը դու ես» կարգախոսով համերգներ եւ Հայաստանի անկախությունը նկարագրող ցուցահանդեսներ կանցկացվեն Երեւանի վարչական շրջաններում, հանրապետության մարզերում եւ արտերկրում: Երեւանի Սուրբ Գրիգոր Լուսավորիչ մայր եկեղեցում կկատարվի հանրապետական մաղթանք՝ Գարեգին Բ-ի հանդիսապետությամբ:
Տոնի կապակցությամբ Երեւանի ճարտարապետական նշանակություն ունեցող շենքերը կստանան գեղարվեստական լուսավորություն:
Նիստի ընթացքում ծավալվել է մտքերի շահագրգիռ փոխանակություն, որի ընթացքում ՀՀ նախարարությունների եւ գերատեսչությունների ղեկավարները ներկայացրել են իրենց գերատեսչությունների կողմից կազմակերպվող տոնական միջոցառումների ընթացքը:
Վարչապետը հանձնարարել է նախարարությունների եւ գերատեսչությունների ղեկավարներին՝ փոխհամագործակցության միջոցով օպերատիվ կերպով արձագանքել հնարավոր խնդիրներին՝ տոնական միջոցառումները բարձր մակարդակով եւ սահմանված ժամանակացույցին համապատասխան կազմակերպելու համար:
