ԱՄՆ պետքարտուղար Էնթոնի Բլինքենը կիրակի երկօրյա այց կկատարի Չինաստան՝ բանակցությունների համար՝ փորձելով սառեցնել երկու տերությունների միջեւ լարվածության սրումը, հաղորդում է The Associated Press-ը:

Բլինքենը կդառնա ԱՄՆ նախագահ Ջո Բայդենի՝ պաշտոնը ստանձնելուց հետո Չինաստան այցելած ամենաբարձրաստիճան ամերիկացի պաշտոնյան եւ վերջին հինգ տարվա ընթացքում նման ուղեւորություն կատարած առաջին պետքարտուղարը:

Սակայն մոլորակի երկու խոշորագույն տնտեսությունների առջեւ ծառացած առավել սուր հարցերի լուծման հարցում զգալի բեկման հեռանկարները մեծ չեն, քանի որ վերջին տարիներին երկու երկրների միջեւ հարաբերությունները գնալով ավելի են լարվում: Թշնամանքն ու նախատինքները կայուն կերպով աճում են մի շարք տարաձայնությունների պատճառով, որոնք ազդում են գլոբալ անվտանգության եւ կայունության վրա: 

Բայդենը եւ Չինաստանի նախագահ Սի Ծինփինը պայմանավորվել են Բլինքենի ուղեւորության մասին նախապես՝ անցյալ տարի Բալիում կայացած հանդիպման ժամանակ: Այն պետք է տեղի ունենար փետրվարին, սակայն հետաձգվել էր դիվանագիտական եւ քաղաքական խառնաշփոթի պատճառով, որն առաջացել էր, ինչպես պնդում են ԱՄՆ-ում, կործանված չինական լրտեսական օդապարիկի հայտնաբերման պատճառով, որը թռչում էր Միացյալ Նահանգների տարածքով:

Տարաձայնությունների եւ հակամարտության հավանական կետերի ցանկը երկար է՝ Թայվանի հետ առեւտրից, Չինաստանում մարդու իրավունքների իրավիճակից մինչեւ Հոնկոնգ, Հարավչինական ծովում չինական ռազմական ակտիվությունից մինչեւ ուկրաինական պատերազմ:

Ուրբաթ օրը Վաշինգտոնից Բլինքենի մեկնելուց առաջ ամերիկացի պաշտոնյաները հայտարարել են, որ նա կբարձրացնի այդ թեմաներից յուրաքանչյուրը։

Մեկնելուց անմիջապես առաջ Բլինքենը շեշտել է ԱՄՆ-ի եւ Չինաստանի միջեւ ավելի արդյունավետ կապի հաստատման եւ պահպանման կարեւորությունը: