նախընտրելի դարձնել«Ժառանգությունը» կառավարությունից պահանջում է անհապաղ քայլեր ձեռնարկել` սողանքի հետեւանքով բոլոր անհայտ կորած անձանց ընտանիքներին անհրաժեշտ ու արժանապատիվ օգնություն կազմակերպելու նպատակով:
Այս բովանդակությամբ հաղորդագրություն է տարածել, «Ժառանգության» պատգամավոր Անահիտ Բախշյանը:
Հաղորդագրության մեջ, մասնավորապես, ասվում է.
«Հայաստանում հոկտեմբերի 3-ին տեղի ունեցավ բնական աղետ. սողանքի հետեւանքով մինչ օրս անհետ կորած է հինգ մարդ, որոնց դեռեւս սպասում են իրենց ընտանիքներում:
Շաբաթ օրն այցելեցի Սոսումատյան եղբայրների տուն, որտեղ նրանց տասը երեխաները, կանայք ու բոլոր հարազատները անորոշության ու շվարումի մեջ` չգիտեն իրենց անելիքն ու ասելիքը: Աննկարագրելի վիճակ էր, չգտա մխիթարանքի ու սփոփանքի խոսքեր:
Փոխարենը խոր ամոթ զգացի Կառավարության, Քանաքեռ-Զեյթուն համայնքի պատկան մարմինների` որպես պետության ներկայացուցիչների մարդկային տարրական վերաբերմունքի բացակայության պատճառով: Միթե նախագահի կամ վարչապետի հանձնարարականն էր անհրաժեշտ (չնայած պետք է լիներ), որպեսզի պատկան մարմինները սեփական նախաձեռնությամբ այցելեին դժբախտության մեջ հայտնված ընտանիքներին, կամ մեծ ծա՞խս էր պահանջվում նրանցից` այցելելու, պետության ուշադրությանն արժանացնելու ու առնվազն հոգեբանական օգնություն կազմակերպելու համար: Սա պետության կողմից մեր քաղաքացիների նկատմամբ աններելի, անթույլատրելի անտարբերության հերթական օրինակն է:
«Ժառանգությունը» կառավարությունից պահանջում է անհապաղ քայլեր ձեռնարկել` սողանքի հետեւանքով բոլոր անհայտ կորած անձանց ընտանիքներին անհրաժեշտ ու արժանապատիվ օգնություն կազմակերպելու նպատակով»:
Ավելի վաղ NEWS.am-ը հայտնել էր, որ այսօր` հոկտեմբերի 10-ին, ժամը 10.28-ին, սողանքի գոտում, հողազանգվածից դուրս են բերել անհետ կորածների ցուցակում նշվող Երեւանի բնակիչներ, Սորսումատյան եղբայրների` «Մերսեդես C 220» մակնիշի 27 ՕՍ 939 համարանիշի սեւ մարդատար ավտոմեքենան, որում հայտնաբերվել է 2 դի: Ավտոմեքենայում գտնվել են 38-ամյա Արմեն եւ 47-ամյա Մեխակ Սորսումատյան եղբայրների դիերը:
