Նախագահ Ջո Բայդենը ԱՄՆ ֆինանսների նախկին նախարար Ջեյքոբ Լյուին առաջադրել է Իսրայելում ԱՄՆ հաջորդ դեսպանի պաշտոնում, հայտնում է Սպիտակ տունը։

Լյուն, ով Օբամայի վարչակազմի օրոք ծառայում էր որպես Սպիտակ տան աշխատակազմի ղեկավար և կառավարման և բյուջեի գրասենյակի տնօրեն, կփոխարինի դեսպան Թոմ Նայդսին, ով պաշտոնը լքեց հուլիսին:

Ինչպես նշում է Associated Press-ը, եթե Լյուն հաստատվի Սենատի կողմից, նա կստանձնի ամենազգայուն դիվանագիտական ​​պաշտոններից մեկը, քանի որ Բայդենի վարչակազմը Իսրայելին և Սաուդյան Արաբիային՝ Մերձավոր Արևելքի երկու խոշորագույն տերություններին, բայց վաղեմի մրցակիցներին, մղում է կարգավորել իրենց հարաբերությունները:

Այս պատմականորեն անկայուն հարաբերություններն ամրապնդելու ջանքերը գալիս են այն բանից հետո, երբ Թրամփի վարչակազմը նպաստեց այսպես կոչված «Աբրահամի համաձայնագրերին», որոնք կարգավորեցին հարաբերությունները Իսրայելի և Արաբական Միացյալ Էմիրությունների, Բահրեյնի և Մարոկկոյի միջև:

Սաուդյան Արաբիայի՝ ամենահզոր և ամենահարուստ արաբական պետության հետ հարաբերությունների կարգավորման գործարքը կարող է փոխել իրավիճակը տարածաշրջանում և զգալիորեն ամրապնդել Իսրայելի դիրքերը, նշում է լրատվամիջոցը։

Այնուամենայնիվ, նման համաձայնության հասնելը հեշտ գործ չէ, քանի որ թագավորությունը հայտարարել է, որ պաշտոնապես չի ճանաչի Իսրայելը, քանի դեռ չի լուծվել տասնամյակներ շարունակվող պաղեստինա-իսրայելական հակամարտությունը:

Լյուն ներկայումս Լինդսի Գոլդբերգ մասնավոր բաժնետիրական ընկերության կառավարիչ գործընկեր է և Նյու Յորքի Կոլումբիայի համալսարանի հրավիրյալ պրոֆեսոր: Լյուի խոսնակն ասել է, որ նրա թեկնածության վերաբերյալ օպերատիվ մեկնաբանություն չունի։