Իտալիայի վարչապետ Ջորջիա Մելոնին կիրակի  հայտարարել է, որ Չինաստանի հետ Իտալիայի հարաբերություններն ավելին են, քան «Գոտի և ճանապարհ» (BRI) նախաձեռնությունը՝ հավելելով, որ BRI-ից դուրս գալու վերաբերյալ վերջնական որոշումը դեռ պետք է կայացվի, հաղորդում է Reuters-ը:

Ավելի վաղ իտալական լրատվամիջոցները հայտնել էին, որ Իտալիան դուրս կգա BRI-ից և փոխարենը կփորձի աշխուժացնել Չինաստանի հետ 2004 թվականին ստորագրված  ռազմավարական գործընկերության համաձայնագիրը, որն ուղղված է տնտեսական համագործակցության ամրապնդմանը։

Իտալիան G7-ի միակ երկիրն է, որը ստորագրել է BRI-ն՝ համաշխարհային առևտրի և ենթակառուցվածքների ծրագիրը, որը ստեղծվել է հին Մետաքսի ճանապարհի օրինակով, որը կապում էր կայսերական Չինաստանը  Արևմուտքի հետ:

Իտալիան հաջորդ տարի նախագահելու է G7-ը, և Պեկինի հետ իր հարաբերությունների վերանայումը կհանգստացնի նրա արևմտյան դաշնակիցներին, ովքեր վախենում են չինական ազդեցությունից:

«Կան եվրոպական երկրներ, որոնք վերջին տարիներին «Գոտի և ճանապարհի» մաս չեն կազմել, բայց կարողացել են ավելի բարենպաստ հարաբերություններ հաստատել (Չինաստանի հետ), քան մենք երբեմն կարողացել ենք»,- ասել է Մելոնին G20-ից հետո կայացած մամուլի ասուլիսում։  

Մելոնին շաբաթ օրը G20-ի շրջանակում հանդիպել էր Չինաստանի վարչապետ Լի Ցյանի հետ և բանակցությունները որակել է քաղաքավարի և կառուցողական:

«Հարցն այն է, թե ինչպես ապահովել գործընկերություն, որը ձեռնտու է երկու կողմերին՝ մի կողմ դնելով այն որոշումը, որը մենք կկայացնենք BRI-ի վերաբերյալ», - ավելացրել է նա:

Մելոնին նշել է, որ չինացիները կրկնել են Պեկին այցելելու իրենց հրավերը, սակայն ամսաթիվը դեռ որոշված ​​չէ։

Իտալիայի կառավարությունը հրավիրվել է նաև«Գոտի և ճանապարհ» նախաձեռնության ֆորումին, որը Չինաստանը կանցկացնի հոկտեմբերին, ավելացրել է  նա:

Իտալացի քաղաքական գործիչները կասկածի տակ են դրել 2019 թվականին նախորդ վարչակազմի կողմից ստորագրված BRI համաձայնագրի արժեքը։

Մելոնիի գրասենյակը շաբաթ օրվա հայտարարության մեջ նշել է, որ հաջորդ տարի լրանում է Չինաստանի և Սիլվիո Բեռլուսկոնիի գլխավորած կառավարության կողմից 2004 թվականին ստորագրված համաշխարհային ռազմավարական գործընկերության համաձայնագրի 20-ամյակը։