ԱՄՆ-ն պայթեցրել է «Հյուսիսային հոսքերը»-ը և Ուկրաինան վերածել ռազմակենսաբանական փորձարկումների փորձադաշտի, նրան պատրաստում էին Ռուսաստանի դեմ ռազմական գործողությունների, հայտարարել է ՌԴ Անվտանգության խորհրդի քարտուղար Նիկոլայ Պատրուշևը, փոխանցում է ТАСС-ը։

Նա պատահական չի համարում ԱՄՆ նախագահ Ջո Բայդենի խոսքերն  այն մասին, որ Ուկրաինային և Իսրայելին ռազմական օգնությունը «իմաստուն ներդրում է, որն օգուտ կբերի ամերիկյան անվտանգությանը սերունդների համար»: Պատրուշևն ուշադրություն է հրավիրել այն փաստի վրա, որ ԱՄՆ-ն իր քաղաքականությամբ հրահրել և շարունակում է սրել իրավիճակը Մերձավոր Արևելքում։

«Նրանք ճիշտ նույն կերպ են վարվում Ուկրաինայում, որտեղ պետական ​​հեղաշրջում հրահրեցին, նպաստում էին նեոնացիստական ​​գաղափարախոսության սերմանմանը, Ուկրաինան դարձրին ռազմակենսաբանական փորձարկումների փորձադաշտ, աչք էին փակում Դոնբասում խաղաղ բնակիչների սպանությունների վրա և ռազմական գործողությունների էին պատրաստում մեր երկրի դեմ։ Այս պայմաններում Ռուսաստանը ոտքի կանգնեց՝ պաշտպանելու Դոնբասի բնակչությանը եւ թույլ չտվեց, որ ագրեսիվ ծրագրեր իրականացվեն»,- ասել է ՌԴ Անվտանգության խորհրդի քարտուղարը։

Ինչպես նշել է Պատրուշևը, ՆԱՏՕ-ի երկրների ներկայացուցիչներն արդեն բացահայտ ասում են, որ Ռուսաստանը խանգարել է իրենց մոտենալ ռուսական սահմաններին, իսկ Արևմուտքի համար ուկրաինացիները Ռուսաստանին զսպելու գործիք են։

«Բացի այդ, ԱՄՆ-ն, օգտագործելով ուկրաինական ճգնաժամը, հասավ Եվրոպայի և Ռուսաստանի միջև տնտեսական հարաբերությունների խզման և տնտեսական մրցակիցների վերացմանը։ Նրանք իրենց տնտեսական խնդիրները լուծում են այլ երկրների հաշվին։ Եվ որպեսզի Եվրոպան չկարողանա գազ ստանալ Ռուսաստանից, նրանք պայթեցրին «Հյուսիսային հոսքը»,- թվարկեց նա Վաշինգտոնի քայլերը։