նախընտրելի դարձնել
Ամերիկյան հատուկ ծառայությունները մահափորձից 57 րոպե առաջ ԱՄՆ նախագահի հանրապետական թեկնածու Դոնալդ Թրամփի դեմ մահափորձի երկու լուսանկար են ունեցել, սակայն բավարար միջոցներ չեն ձեռնարկել քաղաքական գործչին պաշտպանելու համար, գրում է The New York Times-ը՝ հրապարակելով իրավապահների հակադիպուկահարների խմբի աշխատակիցների աշխատանքային նամակագրության սքրինշոթերը։
«Երիտասարդն ուսումնասիրում է այն շենքը, որտեղ մենք ենք։ Ես տեսա նրան հեռաչափով, նա նայում էր դեպի բեմը (որտեղ ելույթ էր ունենում Թրամփը): Եթե ուզում եք, Գաղտնի ծառայության դիպուկահարներին ասացեք, որ աչքերը չորս անեն։ Ես նրան կորցրի տեսադաշտից։ Սա փոխանցեք հրամանատարությանը, թող պարեկային ծառայության աշխատակիցները ստուգեն»,- մահափորձից արդեն կես ժամ առաջ գրել էր հակադիպուկահարների խմբի աշխատակիցներից մեկը։
Պարբերականի տվյալներով՝ Թրամփին կրակած Թոմաս Մեթյու Քրուքսին նկատել են ավելի վաղ՝ առաջին կրակոցից 1 ժամ 45 րոպե առաջ։ «Մեր հետևից ինչ-որ մեկը մտավ ներս ու կայանեց մեր մեքենաների կողքին։ Ես պարզապես տեղեկացնում եմ ձեզ, քանի որ դուք տեսաք, որ ես դուրս եկա հրացանով և դրեցի այն մեքենան, այնպես որ նա (Քրուքսը) գիտի, որ դուք այնտեղ եք», - խմբակային չաթում իր գործընկերներին զգուշացրել է հակադիպուկահարը: Հրապարակված հաղորդագրությունները ցույց են տալիս, որ հրաձիգը գիտեր, թե որտեղ են տեղակայված հակադիպուկահարները և «հաճախ մեկ քայլ առաջ էր անվտանգության ուժերից, մասնավորապես Գաղտնի ծառայությունից», - գրում է պարբերականը:
Այն բանից հետո, երբ ոստիկանները տեսադաշտից կորցրին տոնավաճառում ուսապարկով և հեռաչափով շրջող կասկածելի տղամարդուն, սկսել են փնտրել նրան և ենթադրել են, որ կրակողը բարձրացել է բեմին և նախկին նախագահին նայող տանիք, բայց միևնույն ժամանակ Թրամփին թույլ է տվել ելույթ ունենալ, նշում է պարբերականը։ Հանրապետականին «փրկել է ոչ թե իրեն պաշտպանած իրավապահների հսկայական ջոկատը, այլ զուտ պատահականությունը։ Նա շրջել է գլուխը, և Քրուքսի առաջին գնդակը սլացել է նրա կողքով և միայն ականջն է վնասել», - գրում է New York Times-ը:
