«Հայփոստ»ը ՄԻԱՎ/ՁԻԱՀ-ի դեմ պայքարի համաշխարհային օրվա՝ դեկտեմբերի 1-ի,  կապակցությամբ հատուկ նամականիշ է մարել։ Ինչպես NEWS.am-ին տեղեկացրին «Հայփոստ» ՓԲԸ-ի լրատվական ծառայությունից, ՄԻԱՎ վարակի կանխարգելմանը նվիրված հատուկ նամականիշի մարումը պաշտոնապես կատարվել է Կիեւյան 4 հասցեում գտնվող 0028 փոստային բաժանմունքում։

Արարողությունն իրականացրել են «Հայփոստ թրասթ մենեջմենթ»-ի գլխավոր տնօրեն Խուան Պաբլո Գեչիջյանը, «Հայփոստ»-ի գլխավոր տնօրենի պաշտոնակատար Հայկ Ավագյանը, ՄԱԿ-ի հայաստանյան գրասենյակի սոցիալական համախմբման եւ գործընկերության խորհրդատու Նաիրա Սարգսյանը, ՁԻԱՀ-ի կանխարգելման ազգային կենտրոնի տնօրեն Սամվել Գրիգորյանը:

«Հայփոստ»-ի գլխավոր տնօրենի պաշտոնակատար Հայկ Ավագյանի խոսքով՝ Հայփոստ թրասթ մենեջմենթի ղեկավարությամբ, ընկերությունը քայլեր է ձեռնարկում հայկական ֆիլատելիայի զարգացման ուղղությամբ եւ առանձնահատուկ ուշադրություն է դրսեւորում Փոստի համաշխարհային միության համատեղ թողարկումներին, եւ ընդհանրապես համաշխարհային կարեւորության օրերին եւ տարելիցներին: 

Նույն օրը Հայաստանի արտաքին գործերի նախարարության շենքում տեղի ունեցավ ԱՊՀ կազմավորման 20-ամյակին նվիրված նամականիշի մարման արարողություն:

Միջոցառմանը ներկա են եղել Հայաստանի տրանսպորտի եւ կապի նախարար Մանուկ Վարդանյանը, ՀՀ փոխարտգործնախարար Շավարշ Քոչարյանը, «Հայփոստ Թրասթ Մենեջմենթ»-ի եւ «Հայփոստ»-ի ղեկավարությունը:

Տեղեկացնենք, որ ԱՊՀ կազմավորման հոբելյանին նվիրված նամականիշի տեխնիկական բնութագիրը հետեւյալն է՝

Թողարկման օրը` 1 դեկտեմբերի 2011թ.

Դիզայնը` Դավիթ Դովլաթյան

Տպարանը` Lowe Martin Group /Կանադա/

Տպագրությունը` օֆսեթ

Ատամնաշարը` սանրավոր, 13 1/4:13 1/2

Թուղթը` առանց ջրային նիշերի, 110 գ/մ2

Գույնը` բազմագույն

Անվանագինը` 280 դրամ

Նամականիշի չափերը` 24 x 40 մմ

Մեկ թերթի վրա` 10 (2x5)

Տպաքանակը` 40 000

ՄԻԱՎ վարակի կանխարգելմանը նվիրված հատուկ նամականիշի տեխնիկական տվյալներն են.

Տպագրատուն. Lowe Martin Group (Կանադա)

Նամականիշի չափը. 30.3 x 60 մմ

Հուշանվերային թերթիկի չափը. 80.2 x 114.3 մմ

Անվանական արժեքը. 480 ՀՀ դրամ

Տպաքանակը. 30000

Հեղինակ. Արամայիս Իսկանդարյան