նախընտրելի դարձնել
ԱՄՆ Գաղտնի ծառայությունը հաստատել է նախկին նախագահ և ԱՄՆ նախագահի թեկնածու Դոնալդ Թրամփի գոլֆի ակումբի մոտ կրակոցների փաստը և սերտորեն համագործակցում է իշխանությունների հետ և հետաքննում իրավիճակը, հայտնում է Fox News-ը։
«Գաղտնի ծառայությունը Փալմ Բիչ շրջանի շերիֆի գրասենյակի հետ հետաքննում է նախկին նախագահ Դոնալդ Թրամփի պաշտպանության հետ կապված միջադեպը, որը տեղի է ունեցել ժամը 14․00-ից քիչ առաջ: Նախկին նախագահը ապահով է»,- հաստատել է գործակալությունը X սոցցանցում հրապարակած հաղորդման մեջ։
Ավելի վաղ ԱՄՆ նախագահի թեկնածու Դոնալդ Թրամփի նախընտրական շտաբը հայտարարել էր, որ Թրամփը «անվտանգ է նրա անմիջական հարևանությամբ հնչած կրակոցներից հետո»։
«Նախագահ Թրամփը ապահով է այն բանից հետո, երբ նրա մերձակայքում կրակոցներ են հնչել։ Այս պահին այլ մանրամասներ չկան», - ասել է Թրամփի նախընտրական շտաբի խոսնակ Սթիվեն Չունգը:
Հաղորդվում է, որ ԱՄՆ նախկին նախագահը գոլֆ էր խաղում Ուեսթ Փալմ Բիչում գտնվող Trump International Golf Club-ում: Դաշտն անմիջապես փակվել է, հայտնել է ծանոթ աղբյուրը։
Ինչպես հայտնում է New York Post-ը, Թրամփի գոլֆի ակումբի մոտ երկու հոգու միջև փոխհրաձգություն է տեղի ունեցել, և նրան ոչ մի վտանգ չի սպառնում։
