նախընտրելի դարձնելՀայաստանի գլխավոր դատախազ Աղվան Հովսեփյանն այսօր` դեկտեմբերի 9-ին, ընդունել է Երեւանի «Մանց» համալսարանի իրավագիտության ամբիոնի` 2011 թվականի մագիստրատուրայի շրջանավարտներին եւ նրանց ներկայացրել դատախազության ընդհանուր կառուցվածքը, գործառույթներն ու աշխատանքի ընդունվելու ընթացակարգը:
Դատախազության մամուլի ծառայությունից NEWS.am-ին հայտնում են, որ նշված ամբիոնն այս տարի ավարտել է 7 ուսանող, որոնցից 5-ը՝ քրեաիրավական մասնագիտացմամբ, մյուս երկուսն ընտրել են քաղաքացիաիրավական ուղղվածությունը:
Շնորհավորելով շրջանավարտներին՝ ՀՀ գլխավոր դատախազը հույս հայտնեց, որ նրանք իրենց մասնագիտական գիտելիքները կուղղորդեն իրավական մտքի զարգացմանն ու իրավական պետության կայացմանը՝ կոչ անելով մշտապես հետամուտ լինել իրենց ինքնակրթությանն ու վերապատրաստմանը:
«Որքան էլ համալսարանում լավ սովորեք, ստանալով ակադեմիական կրթություն եւ ձեռք բերելով իրավագիտության վերաբերյալ մասնագիտական գիտելիքներ, որպես պրոֆեսիոնալ եւ գործող իրավաբան` պարտավոր եք հետամուտ լինել ձեր գիտելիքների զարգացմանը, պարբերաբար մասնակցեք վերապատրաստումների եւ հետեւեք օրենսդրական դաշտի փոփոխություններին: Այլապես կդադարեք լինել պրակտիկ իրավաբաններ`դառնալով իրավաբանության պատմության մասնագետներ»,- ասել է ՀՀ գլխավոր դատախազը եւ հորդորել լինել հետեւողական, սկզբունքային իրենց գործունեության մեջ:
Ա. Հովսեփյանը, ով նաեւ գլխավորում է «Մանց» համալսարանի «Քրեաիրավական մասնագիտացում» առարկայի պետական ավարտական քննական հանձնաժողովը, հաստատել է ավարտական քննությունների արդյունքները եւ մագիստրոսներին նվիրել իր հեղինակած գրքերը:
