Եվրահանձնաժողովի ներկայացուցիչ Աննա-Կաիսա Իտկոնենը մտահոգություն է հայտնել Ռուսաստանի Դաշնության Կրասնոդարի երկրամասում գտնվող «Թուրքական հոսք» գազատարի կոմպրեսորային կայանի վրա ուկրաինական անօդաչու թռչող սարքերի հարձակման կապակցությամբ։

«Ակնհայտ է, որ էներգետիկ ենթակառուցվածքների վրա ցանկացած հարձակում մտահոգիչ է։ Մենք ուկրաինական կողմի հետ այս զեկույցը քննարկելու որևէ կոնկրետ ենթատեքստ չունենք, բայց ակնհայտ է, որ մենք շարունակում ենք վերահսկել իրավիճակը Ուկրաինայում, Մոլդովայում, ինչպես նաև ԵՄ անդամ երկրներում մատակարարման անվտանգության ցանկացած խնդրի առնչությամբ», - ասել է Իտկոնենը։

Ռուսաստանի պաշտպանության նախարարությունն այսօր՝ հունվարի 13-ին, հայտարարել է, որ շաբաթ օրը՝ հունվարի 11-ին, 9 ուկրաինական անօդաչու թռչող սարքեր հարձակվել են Ռուսաստանի Դաշնության Կրասնոդարի երկրամասի Գայ-Կոդզորի «Ռուսկայա» կոմպրեսորային կայանի վրա։