Նախընտրելի
Բրիտանացի տղամարդը, որը ավելի քան 26․000 դոլար էր վճարել իր գողացված մեքենան փոխարինելու համար, հետագայում պարզել է, որ անգիտաբար հետ է գնել իր սեփական մեքենան, հաղորդում է UPI-ն։
Անգլիայի Սոլիհալ քաղաքից 36-ամյա Էվան Վալենտինը պատմել է, որ փետրվարի 28-ին հայտնաբերել է, որ իր սև 2016 թվականի արտադրության Honda Civic Type-R մակնիշի մեքենան գողացել են գիշերային ավտոկայանատեղիից:
Վալենտինն ասել է, որ վշտացած էր կորստի պատճառով և հույս ուներ մեքենան փոխարինել գրեթե նույնպիսի մեքենայով։
«Իհարկե, վաճառվողների մեջ ես նմանը գտա։ Նույն գույնը, արտադրման նույն տարեթիվը, նույն պատվերով պատրաստված արտանետման համակարգը», - գրել է նա սոցիալական ցանցում։
Համարանիշները և VIN համարը տարբերվում էին իր գողացված մեքենայից, ուստի նա մեծ ուշադրություն չդարձրեց նմանություններին և վճարեց ավելի քան 26․000 դոլար մեքենայի համար։
«Երբ նրան տուն բերեցի, սկսեցի տարօրինակ բաներ նկատել։ Բեռնախցիկում նկատեցի վրանի ցցեր և մի քանի տոնածառեր։ Նկատեցի, որ անիվի ամրացնող պտուտակը Tesco-ի սենդվիչի տոպրակի մեջ էր։ Կենտրոնական պահեստային բաժնում նկատեցի որոշ փաթեթներ։ Սա տարօրինակ կերպով նման է իմ գողացված մեքենային», - գրել է նա։
Վալենտինը որոշեց ստուգել մեքենայի GPS նավիգատորը և պարզեց, որ մեքենան նախկինում եղել է իր տանը, իր ծնողների տանը և նույնիսկ իր գործընկերների ծնողների տանը։
