նախընտրելի դարձնել
ԱՄԷ-ի «ոսկե վիզայի» ծրագիրը ստացել է իր ամենամեծ ընդլայնումը մեկնարկից ի վեր, ակնհայտորեն աչքի ընկնելով երկիր ժամանած հարուստ և տաղանդավոր ռուսների վրա։ Այժմ 10 տարվա բնակության թույլտվության համար կարող են դիմել ոչ միայն ներդրողները և բարձր որակավորում ունեցող մասնագետները, այլև նոր կատեգորիաների ներկայացուցիչները՝ բժշկական աշխատողներ, թվային բովանդակության ստեղծողներ, տեսախաղերի և էլեկտրոնային սպորտի մասնագետներ, ինչպես նաև խոշոր զբոսանավերի սեփականատերեր։ Ծրագրի ընդլայնումը նպատակ ունի երկիր ներգրավել տաղանդներ, կապիտալ և տեխնոլոգիական փորձագիտություն, հայտնում են ԱՄԷ իշխանությունները։ Վիզա ունեցողներին տրվում է երկարաժամկետ բնակության իրավունք, կարող են բերել իրենց ընտանիքներին, գրանցել նրանց կրթական հաստատություններում, օգտվել առողջապահական համակարգից, գնել անշարժ գույք և վարել բիզնես։
Նոր ծրագրի պայմաններով, «ոսկե վիզայի» համար կարող են դիմել 40 մետրից ավելի երկարությամբ մասնավոր զբոսանավերի հարուստ սեփականատերերը, նավաշինարանների թոփ մենեջերները, զբոսանավային ընկերությունների բաժնետերերը, ինչպես նաև այս ոլորտի ծառայություններ մատուցողները։ Նորարարությունը հստակ ուղղված է ռուս գործարարներին, ովքեր փախել են պատժամիջոցներից և ԱՄԷ-ն համարում են անվտանգ ապաստան։ ԱՄԷ նավահանգիստներում նկատվել են ռուսների հետ կապված տասնյակ սուպերզբոսանավեր՝ Անդրեյ Մելնիչենկոյի (արդեն ԱՄԷ քաղաքացի) 118 մետրանոց Motor Yacht A-ն, Վիկտոր Ռաշնիկովի 140 մետրանոց Ocean Victory-ն, Սերգեյ Գալիցկիի հետ կապված 104 մետրանոց Quantum Blue-ն, Անդրեյ Սկոչի ընտանիքին կապված 99 մետրանոց Madam GU-ն և Լեոնիդ Միխելսոնի 85 մետրանոց Pacific X-ը։
Դուբայում ռուսախոս բլոգերներն ու կիբերսպորտի խաղացողները չափազանց ակտիվ են։ Ռուսների կողմից հիմնադրված True Gamers կիբերակումբների միջազգային ցանցը նախատեսում է գնել Աբու Դաբիի մոտակայքում գտնվող կղզի և զարգացնել այն կիբերսպորտի թեմայով։ True Gamers-ը հայտնել է, որ աշխարհի առաջին նմանատիպ նախագծի՝ eSports Island անվանումով ներդրումները նախնական հաշվարկով կկազմեն ավելի քան 280 միլիոն դոլար։ Նախագիծը ներառում է ռուս խաղացողներով ղեկավարվող էլեկտրոնային սպորտի թիմեր՝ Team Spirit, Virtus.pro և Team BetBoom: Տարբեր գնահատականներով, Ռուսաստանից հարյուրավոր բլոգերներ նույնպես կարող են բնակվել Էմիրություններում։ Դուբայում հաճախ կարելի էր հանդիպել TikToker Դանիա Միլոխինին, Սերգեյ Կոսենկոյին, Ալինա Շպակին, Վալերիա Չեկալինային, Իննա Տլիաշինովային և Հուսեյն Հասանովին։
ԱՄԷ-ն կարող է նաև ոսկե վիզաներ տրամադրել Ռուսաստանից ժամանած բժշկական աշխատողներին՝ առողջապահության ոլորտում հատուկ արժանիքների և երկարաժամկետ աշխատանքի համար։ Տարածաշրջանում նկատվում է Ռուսաստանից բժիշկների աննախադեպ հոսք։ Վերջին մի քանի տարիների ընթացքում քաղաքում բացվել է 30 նոր կլինիկա, որոնք հիմնադրվել են նախկին Խորհրդային Միության ներդրողների կողմից. միայն 2024 թվականին Դուբայի բժշկական համայնքին միացել է 150 ռուսալեզու մասնագետ։ 2023 թվականին Էմիրություններում չկար ոչ մի ռուսական բժշկական ցանց։ 2024 թվականին Volna-ն ստացել է տեղափոխման 9000 դիմում, որոնցից 500-ը արդեն ակտիվորեն պատրաստվում են քննություններին՝ Դուբայում աշխատելու իրավունք ստանալու համար։
