Թուրքիայի նախագահ Ռեջեփ Թայիփ Էրդողանը ճարպակալման դեմ լայնածավալ արշավ է սկսել. այժմ քաղաքացիներին կարող են հրապարակավ կշռել հենց փողոցներում։ Ինչպես հայտնում է Berliner Morgenpost-ը, սանիտարական ծառայությունների աշխատակիցները կանգնեցնում են անցորդներին այգիներում, ավտոբուսի կանգառներում և ֆուտբոլային հանդիպումներից առաջ և չափում նրանց քաշն ու հասակը։

Չափումից հետո հաշվարկվում է մարմնի զանգվածի ինդեքսը (ՄԶԻ). եթե այն հավասար է 25-ի կամ ավելի բարձր է, մարդուն ուղեգրում են բժիշկների մոտ՝ քաշի նվազեցման վերաբերյալ խորհրդատվություն ստանալու համար։ Արշավն անցկացվում է «Իմացի՛ր քո քաշը, ապրի՛ր առողջ» նշանաբանով և կտևի մինչև հուլիսի 10-ը։ Այս ընթացքում նախատեսվում է կշռել երկրի շուրջ տասը միլիոն բնակչի, ինչը կազմում է Թուրքիայի բնակչության մոտավորապես մեկ ութերորդ մասը, հայտնում է Bild-ը։

Առողջապահության համաշխարհային կազմակերպության (ԱՀԿ) տվյալներով՝ թուրքերի ավելի քան 30%-ը տառապում է ճարպակալմամբ. սա գրեթե երկու անգամ գերազանցում է ԵՄ միջին ցուցանիշը։ Գերմանիայում, օրինակ, քաղաքացիների շրջանում ճարպակալման մակարդակը կազմում է մոտ 19%։

Այս նոր միջոցառումը քննադատության ալիք է բարձրացրել սոցիալական ցանցերում։ Քաղաքացիները մտավախություն ունեն, որ կշռումը կդառնա հարկադիր գործընթաց և կարող է վերածվել հանրային նվաստացման։ Իշխանությունները դեռ չեն պարզաբանել, արդյոք նման ստուգումները կամավոր են լինելու։