Ամերիկյան Ինդիանապոլիս քաղաքում շաբաթ օրը վաղ առավոտյան, երկրի Անկախության օրվա տոնակատարության հաջորդ օրը, տեղի ունեցած հրաձգության հետևանքով մեկ մարդ զոհվել է, ևս վեցը՝ վիրավորվել, հայտնում է AFP-ն։

Հրաձգությունը տեղի է ունեցել տեղական ժամանակով ժամը 01:27-ի սահմաններում (Գրինվիչի ժամանակով՝ 05:27-ին), երբ ոստիկանները հետաքննում էին անկարգությունները, մամուլի ասուլիսում հայտնել է ոստիկանության օպերատիվ բաժնի պետի տեղակալ Թանյա Թերին։

Մեկ մարդու մահը արձանագրվել է դեպքի վայրում։ Հինգ վիրավոր դեպքի վայրից տեղափոխվել է հիվանդանոց՝ բուժօգնություն ստանալու համար, իսկ վեցերորդը կայուն վիճակում տեղափոխվել է բժշկական հաստատություն։ Թերին հայտնել է, որ տուժածներից երեքը անչափահաս են, այդ թվում՝ զոհվածը՝ չնշելով մյուսների տարիքն ու վիճակը։

Ոստիկանությունը դեպքի վայրում հայտնաբերել է մի քանի միավոր հրազեն և հարցաքննության համար բերման է ենթարկել յոթ մարդու։ Ինդիանապոլիսի ոստիկանապետ Քրիս Բեյլին դատապարտել է քաղաքի կենտրոնում կրկնվող բռնությունները, հատկապես երիտասարդների մասնակցությամբ։

Ըստ ոստիկանապետի, Ինդիանապոլիսի կենտրոնում հրաձգությունը հանգստյան օրերին բռնության երկրորդ բռնկումն էր։

Հրազենի կիրառմամբ բռնության լուրջ դեպքերը տարածված են Միացյալ Նահանգներում, որտեղ շատ նահանգներում գործնականում որևէ խոչընդոտ չկա հրազեն ձեռք բերելու համար՝ չնայած զենքի նկատմամբ վերահսկողությունն ուժեղացնելու միջոցառումների լայն աջակցությանը։

Ըստ Gun Violence Archive-ի, այս տարի Միացյալ Նահանգներում տեղի է ունեցել 189 զանգվածային հրաձգություն, որոնք, ըստ իրենց սահմանման, կատարվել են չորս կամ ավելի մարդու նկատմամբ։