նախընտրելի դարձնել
Սալվադորի նախագահ Նայիբ Բուկելեն հետ է կանչում Մեքսիկայում իր դեսպանին խորհրդակցությունների համար, այն բանից հետո, երբ Մեքսիկայի անվտանգության նախարարը հայտարարել է, որ թմրանյութերով լի ինքնաթիռը ժամանել է Սալվադորից: Բուկելեն կտրականապես հերքել է մեղադրանքները և պաշտոնական բացատրություն է պահանջել Մեքսիկայի իշխանություններից, հաղորդում է Reuters-ը։
Իր X էջում Բուկելեն ընդգծել է, որ Մեքսիկայի կառավարությունը պետք է «պարզաբանի և հերքի» անվտանգության նախարար Օմար Գարսիա Հարֆուչի խոսքերը։
Երեքշաբթի առավոտյան մամուլի ասուլիսում Հարֆուչը հայտարարել է, որ թմրավաճառներին տեղափոխող փոքր ինքնաթիռը թռել է Սալվադորից և խափանվել մեքսիկական Կոլիմա նահանգում: Ի պատասխան՝ Բուկելեն հրապարակել է ինքնաթիռի ենթադրյալ երթուղու քարտեզը, որի համաձայն այն հայտնվել է Կոստա Ռիկայի ափերի մոտ՝ Սալվադորից հարավ, ապա ուղղվել դեպի հյուսիս՝ Խաղաղ օվկիանոսի վրայով։
«Ինքնաթիռը թռել է Խաղաղ օվկիանոսի վրայով և երբեք չի հատել Սալվադորը», - ասել է նա։
Մեքսիկական իշխանությունների տվյալներով՝ Կոլիմայում վայրէջք կատարելուց հետո ձերբակալվել է երեք մարդ և առգրավվել է 427 կիլոգրամ կոկաին: Բուկելեն ընդգծել է, որ բոլոր ձերբակալվածները Մեքսիկայի քաղաքացիներ են՝ հավելելով, որ ոչ մի պաշտոնական աղբյուր կամ լրատվամիջոց այս մասին չի հաղորդել։
«Սալվադորը չի թաքցնում հանցագործներին կամ չի հանդուրժում թմրանյութերի ապօրինի շրջանառությունը. նա դա չի արել նախկինում և չի անի նաև հիմա», - ասել է Բուկելեն: «Եվ մենք թույլ չենք տա, որ մեզ ներքաշեն այնպիսի գործողությունների մեջ, որոնցում մենք անելիք չունենք»:
