Պերմի ազգային հետազոտական պոլիտեխնիկական համալսարանի գիտնականները նավթային թափոններից կերամիկայի արտադրության մեթոդ են մշակել։ Նորարարության մասին հայտնել է բուհի մամուլի ծառայությունը։

Նավթաշլամները եղել և մնում են նավթարդյունահանման ամենածավալուն թափոններից մեկը, ընդ որում, դրանց վերամշակումը չափազանց բարդ է։ Արդյունահանված յուրաքանչյուր 500 տոննա նավթը պարունակում է շուրջ մեկ տոննա շլամ՝ ածխաջրածինների, ջրի, ծանր մետաղների և քիմիական նյութերի խառնուրդ, որոնք զգալիորեն աղտոտում են շրջակա միջավայրը։

Գիտնականները որոշել են օգտագործել նավթաշլամների պիրոլիզի (ջերմային մշակում առանց թթվածնի) արդյունքում ստացված ածխածին պարունակող արտադրանքը՝ որպես կերամիկայի արտադրության հավելում։ Կավային խառնուրդին 15-20% նման նյութ ավելացնելիս կարելի է ստեղծել թեթև, ծակոտկեն և ամուր կերամիկա՝ միևնույն ժամանակ նվազեցնելով թրծման էներգածախսերը։

Փորձարկումները ցույց են տվել, որ նման տարրերի հավելումը թույլ է տալիս իջեցնել թրծման ջերմաստիճանը 1150-ից մինչև 1080 աստիճան, ինչը հնարավորություն է տալիս խնայել վառելիքը և բարելավել նյութի կառուցվածքը՝ ավելացնելով ապակու ֆազի (կերամիկան ամրացնող նյութ) ծավալը։ Նոր կերամիկան ունի բարձր ծակոտկենություն՝ բավարար ամրության դեպքում, և այն կարելի է օգտագործել ոչ միայն կենցաղում, այլև շինարարության (մասնավորապես՝ կերամզիտի տեսքով) և ջրի կենսաբանական մաքրման համակարգերում։