Չեչնիայի առաջնորդ Ռամզան Կադիրովը գրեթե խեղդվել է Թուրքիայի հարավ-արևմուտքում հանգստանալիս, հաղորդում է թուրքական Milliyet հրատարակությունը։ Ըստ դրա, միջադեպը տեղի է ունեցել Մուղլա քաղաքի հինգաստղանի հյուրանոցի լողափում։ Չեչնիայի առաջնորդը որոշել է լողալ ծովում, բայց սկսել է խեղդվել։ Նրան օգնության է հասել ափամերձ պահպանության խումբը։ Ջրից դուրս բերելուց հետո շտապօգնության խումբը Կադիրովին առաջին բուժօգնություն է ցուցաբերել։ Սակայն նրան հոսպիտալացրել են տեղի մասնավոր կլինիկայում։ Հիվանդանոցում անցկացված հետազոտությունը ցույց է տվել, որ Կադիրովի կյանքին վտանգ չի սպառնում։

«Նովայա գազետա Եվրոպա»-ի աղբյուրների համաձայն՝ վեց տարի առաջ Կադիրովի մոտ ախտորոշվել է ենթաստամոքսային գեղձի նեկրոզ՝ առանց ապաքինման որևէ հույսի։ Այս տարվա գարնանը թերթի աղբյուրները հայտնել են Չեչնիայի ղեկավարի առողջական վիճակի կտրուկ վատթարացման մասին։ Մասնավորապես, նրանց խոսքով, Կադիրովը դադարեցրել է հանրապետությունից դուրս գալը և գրեթե ամբողջ ժամանակն անցկացնում է Գրոզնիի «Աիմեդ» կլինիկայում՝ բժիշկների մշտական հսկողության ներքո, այդ թվում՝ այնտեղ գիշերելով։ Այս ֆոնին Չեչնիայի ղեկավարը ակտիվացրել է իշխանությունը ընտանիքի անդամներին փոխանցելու սցենարը և սկսել է վերաբաշխել ակտիվները։ Նա իր երրորդ որդուն՝ Ադամին, ընտրել է որպես իր իրավահաջորդ, որը նոյեմբերին կդառնա 18 տարեկան։