ԱՄՆ պաշտոնյաները ուրբաթ օրը խիստ քննադատությամբ են հանդես եկել Ֆրանսիայի կողմից սոցիալական ցանց «X»-ի նկատմամբ սկսված քրեական հետաքննության կապակցությամբ։ Այդ հարթակը պատկանում է միլիարդատեր Իլոն Մասկին, իսկ հետաքննությունը կապված է արտասահմանյան միջամտության կասկածների հետ։

«Քրեական հետաքննության շրջանակներում ակտիվիստ ֆրանսիացի դատախազը տեղեկություններ է պահանջում X-ի արտոնագրված ալգորիթմի մասին և X-ը որակում որպես «կազմակերպված հանցավոր խումբ»,- ասված է ԱՄՆ Պետդեպարտամենտի Ժողովրդավարության, մարդու իրավունքների և աշխատանքի հարցերով բյուրոյի X-ի հաշվում։ «Ժողովրդավարական կառավարությունները պետք է թույլ տան, որ բոլոր ձայները լսելի լինեն, այլ ոչ թե լռեցնեն այն խոսքերը, որոնք իրենց դուր չեն գալիս։ Միացյալ Նահանգները կպաշտպանի բոլոր ամերիկացիների խոսքի ազատությունը օտարերկրյա գրաքննության ակտերից»։

Ինչպես հաղորդում է AFP-ն, հուլիսի 11-ին Փարիզի կիբերհանցագործությունների դեմ պայքարի դատախազությունը ոստիկանությանը կոչ է արել հետաքննություն սկսել ենթադրյալ հանցագործությունների, այդ թվում՝ ավտոմատացված համակարգերից տվյալների մանիպուլյացիայի և արդյունահանման վերաբերյալ՝ «հանցավոր խմբավորման կազմում»։

Նախորդ շաբաթ սոցիալական մեդիա ընկերությունը հերքել էր մեղադրանքները՝ դրանք որակելով որպես «քաղաքական դրդապատճառներով»։ X ընկերությունը նաև հայտարարել էր, որ հրաժարվել է կատարել դատախազի պահանջը՝ մուտք ունենալ իր առաջարկությունների ալգորիթմին և իրական ժամանակի տվյալներին։

Հետաքննությունն անցկացվում է հունվարին ներկայացված երկու բողոքների հիման վրա, որոնք պնդում էին, որ X-ի ալգորիթմը օգտագործվել է ֆրանսիական քաղաքականության մեջ օտարերկրյա միջամտության համար։

Բողոքներից մեկը ներկայացվել է նախագահ Մակրոնի կենտրոնամետ կուսակցության խորհրդարանի պատգամավոր Էրիկ Բոտորելի կողմից, ով բողոքում էր «կարծիքների և տարբերակների բազմազանության կրճատումից» և հարթակի կառավարման մեջ Մասկի «անձնական միջամտությունից» այն բանից հետո, երբ նա ստանձնել է այն։ X-ը հայտարարել է, որ «կտրականապես հերքում է» բոլոր մեղադրանքները և որ հետաքննությունը «խեղաթյուրում է  քաղաքական օրակարգին ծառայելու ֆրանսիական օրենսդրությունը և ի վերջո, սահմանափակում է խոսքի ազատությունը»։