Ստամբուլում մազերի փոխպատվաստման ընթացակարգը սկսելուց հետո մի բրիտանացի է մահացել, գրում է The Guardian-ը։

38-ամյա Մարտին Լաթչմանը Միլթոն-Քինսից, որն անցյալ տարի թողել էր իր 16-ամյա դասախոսական կարիերան՝ ռազմական կապալառու դառնալու համար, մահացել է անցյալ շաբաթ։ Նրա ինքնազգացողությունը վատացել է 1500 ֆունտ ստեռլինգ արժողությամբ ընթացակարգի նախապատրաստական փուլում։

Հաղորդվում է, որ կլինիկայի նախկին հաճախորդների թվում է Անգլիայի հավաքականի և «Մանչեսթեր Յունայթեդի» նախկին ֆուտբոլիստ Ռիո Ֆերդինանդը։ Հայտնի չէ, թե ինչու է վատացել Լաթչմանի ինքնազգացողությունը։ Նրան տեղափոխել են մոտակա հիվանդանոցի վերակենդանացման բաժանմունք, սակայն ավելի ուշ՝ նույն օրը, նա մահացել է, հաստատել են կլինիկայում։

Թուրքական լրատվամիջոցները հայտնել են, որ ոստիկանությունը հետաքննություն է սկսել։ Լաթչմանի մարմինն ինքնաթիռով տեղափոխել են Մեծ Բրիտանիա։ Մինչև անցյալ տարվա դեկտեմբեր Լաթչմանը, որը ծնունդով Հարավային Ուելսի Բրիջենդ քաղաքից էր, Բեդֆորդի Գոլդինգթոն ակադեմիայում դպրոցի տնօրենի օգնականն էր, որտեղ նաև ղեկավարում էր համակարգչային գիտությունների ամբիոնը։ Դատելով համացանցում նրա հրապարակումներից՝ նա պարբերաբար վազել է և մարզվել մարզասրահներում։

Իր հերթին թուրքական կլինիկան պնդում է, որ ավելի քան 50 000 հաջող փոխպատվաստում է իրականացրել։

Կլինիկայի հայտարարության մեջ ասվում է, որ նրանք «խորապես վշտացած են» Լաթչմանի մահվան կապակցությամբ։

Ճշտվում է, որ անցյալ ամառ նա հաջողությամբ մազերի փոխպատվաստում է տարել և այս տարի վերադարձել էր կրկնակի ընթացակարգի համար։