նախընտրելի դարձնելԴատարանն ապացուցված է համարել կազմակերպված խմբի կազմում Ռումինիայի քաղաքացի Ադի Իոան Բլագայի կողմից առանձնապես խոշոր չափերով գույքի գաղտնի հափշտակության` գողության, ինչպես նաեւ մի խումբ անձանց կողմից նախնական համաձայնությամբ հանցավոր ճանապարհով ստացված եկամուտներն օրինականացնելու համար առաջադրված մեղադրանքը եւ դատապարտել ազատազրկման:
Դատախազության մամուլի ծառայությունից NEWS.am-ին հայտնում են, որ նախաքննությամբ պարզվել էր, որ 2008թ. հուլիս-օգոստոս ամիսներին Հայաստանի տարածքում գործել են բանկային կեղծ քարտերով բանկոմատներից գումարների գողությամբ զբաղվող 2 կազմակերպված խմբեր ` հիմնականում ձեւավորված Լոնդոնում բնակվող Ռումինիայի քաղաքացիներից, որոնց գործունեությունը ղեկավարել են Մարիուս Լուպուն եւ Կոռնել-Կոնստանտին Ստենգաչուն:
Ստենգաչուի կազմակերպած եւ ղեկավարած հանցավոր խումբը 2008թ. օգոտսոսի 18-ից մինչեւ 27-ն ընկած ժամանակահատվածում Հայաստանում գործող թվով 6 բանկերի պատկանող տարբեր բանկոմատներից գողացել է ընդհանուր առմամբ 77 517 000 ՀՀ դրամ առանձնապես խոշոր չափերի գումար:
Դատարանում հիմնավորված ապացույցների համաձայն` Ռումինիայի քաղաքացի Ադի Իոան Բլագան ընդգրկվել է Կոռնել Կոնստանտին Ստենգաչուի կողմից ձեւավորված հանցավոր խմբի կազմում եւ բանկային քարտերի կեղծ կրկնօրինակների միջոցով բանկոմատներից գումարներ հափշտակել:
Համաձայն դերաբաշխման` Բլագան պետք է Հայաստանի տարածք տեղափոխեր բանկային քարտերի կեղծ կրկնօրինակները, դրանց օգտագործմամբ բանկոմատներից գումար հափշտակեր, հանցավոր խմբի անդամների համար հյուրանոցային համարներ եւ ավտոմեքենաներ վարձակալեր, կազմակերպեր Հայաստանից Մեծ Բրիտանիա գողոնի տեղափոխումը:
Այսպես` Կոռնել Կոնստանտին Ստենգաչուն բանկային քարտերի կեղծ կրկնօրինակների մեծ խմբաքանակ է տրամադրել Ադի Իոան Բլագային, եւ վերջինիս հետ միասին 2008թ. օգոստոսի 18-ին Լոնդոն-Երեւան չվերթով ժամանել Երեւան եւ ակտիվորեն ներգրավվել հանցավոր խմբի գործունեության մեջ:
Հանցավոր խումբը բացահայտվել է 2008թ. օգոստոսի 27-ին, որով հարուցված քրեական գործի նախաքննությունն իրականացրել է ՀՀ ԿԱ ազգային անվտանգության ծառայության քննչական վարչությունը:
Ադի Իոան Բլագայի մասով 2009թ. հունիսի 3-ին քրեական գործի վարույթը կասեցվել էր` նրա գտնվելու վայրը հայտնի չլինելու պատճառով:
Վերջինիս նկատմամբ հայտարարվել էր միջազգային հետախուզում:
Իրավապահ մարմինների համատեղ ձեռնարկված միջոցառումների շնորհիվ Գերմանիայի Դաշնային Հանրապետության Շտուտգարտ քաղաքի օդանավակայանում Ադի Իոան Բլագան 2010թ. մայիսի 25-ին հայտնաբերվել, կալանավորվել է եւ ՀՀ գլխավոր դատախազության պահանջով 2011թ. հունվարի 25-ին էտապավորվել ու հանձնվել է Հայաստանի Հանրապետության իրավապահ մարմիններին:
Ադի Իոան Բլագայի հայտնաբերման եւ կալանավորման կապակցությամբ 2011թ. հունվարի 25-ին քրեական գործի կասեցված վարույթը վերսկսվել է: Նրան մեղադրանք է առաջադրվել ՀՀ քրեական օրենսգրքի 177-րդ հոդվածի 3-րդ մասի 1-ին, 2-րդ կետերով եւ 190-րդ հոդվածի 2-րդ մասի 2-րդ կետով:
Քրեական գործի նախաքննությունն ավարտվել է 2011թ. ապրիլի 30-ին եւ 2011թ. մայիսի 5-ին մեղադրական եզրակացությամբ ուղարկվել է Երեւան քաղաքի Կենտրոն եւ Նորք-Մարաշ վարչական շրջանների ընդհանուր իրավասության դատարան` ըստ էության քննելու համար:
Քրեական գործի նախաքննության ընթացքում ձեռք բերված եւ պատշաճ դատական ընթացակարգով հետազոտված ապացույցների հիման վրա Երեւան քաղաքի Կենտրոն եւ Նորք-Մարաշ վարչական շրջանների ընդհանուր իրավասության դատարանը 2011թ. հոկտեմբերի 28-ի դատավճռով Ադի Իոան Բլագային մեղավոր է ճանաչել ՀՀ քրեական օրենսգրքի 177-րդ հոդվածի 3-րդ մասի 1-ին, 2-րդ կետորով եւ 190-րդ հոդվածի 2-րդ մասի 2-րդ կետով:
ՀՀ քրեական օրենսգրքի 66-րդ հոդվածի 4-րդ մասի կիրառմամբ պատիժները մասնակիորեն գումարելու միջոցով Ադի Իոան Բլագան դատաապարտվել է ազատազրկման` 9 տարի ժամկետով:
Պատժի մեղմացման դեմ Ադի Իոան Բլագայի եւ նրա պաշտպանի կողմից ներկայացվել է վերաքննիչ բողոք, որը քննության ընթացքի մեջ է:
Քրեական գործով ընդհանուր առմամբ կալանավորվել, որպես մեղադրյալ ներգրավվել, ապա դատապարտվել են ազգությամբ ռումինացի թվով 10 անձինք:
Քրեական գործով մեկ այլ հետախուզվող` Դրագոշ Իոնուտ Բոտեզատուն, հայտնաբերվել է 2011թ. հունվարի 7-ին Գերմանիայի Դաշնային Հանրապետության Էրլինգեն քաղաքում: Վերջինս կալանավորվել է եւ ՀՀ գլխավոր դատախազության պահանջով 2011թ. հունիսի 21-ին էտապավորվել ու հանձնվել է Հայաստանի Հանրապետության իրավապահ մարմիններին:
Դրագոշ Իոնուտ Բոտեզատուի հայտնաբերման եւ կալանավորման կապակցությամբ 2011թ. հունիսի 21-ին քրեական գործի կասեցված վարույթը վերսկսվել է:
Դրագոշ Իոնուտ Բոտեզատուին մեղադրանք է առաջադրվել ՀՀ քրեական օրենսգրքի 177-րդ հոդվածի 3-րդ մասի 1-ին, 2-րդ կետերով եւ 190-րդ հոդվածի 3-րդ մասի 1-ին կետով: 2011թ. դեկտեմբերի 13-ին քրեական գործը մեղադրական եզրակացությամբ ուղարկվել է Երեւան քաղաքի Կենտրոն եւ Նորք-Մարաշ վարչական շրջանների ընդհանուր իրավասության դատարան` ըստ էության քննելու համար, որի վերաբերյալ դատաքննությունը դեռեւս ընթացքի մեջ է:
