նախընտրելի դարձնել
ԱՄՆ պաշտպանության նախարար Փիթ Հեգսեթը սեպտեմբերի 30-ին հանդիպում է նշանակել հարյուրավոր ամերիկացի գեներալների և ծովակալների հետ՝ «մարտական ոգու» հարցը քննարկելու համար, գրում է The Washington Post-ը՝ վկայակոչելով աղբյուրներին։
Միջոցառումը տեղի կունենա Վիրջինիա նահանգի Քուանտիկո քաղաքի ծովային հետևակի բազայում։ Ըստ պարբերականի՝ Պենտագոնի ղեկավարը նախատեսում է կարճ ելույթ ունենալ ռազմական չափանիշների և մարտական ոգու վերաբերյալ։ Աղբյուրները գնահատում են, որ այն կտևի մեկ ժամից պակաս։
Միևնույն ժամանակ, որոշ հրամանատարներ պատրաստվում են հնարավոր պաշտոնանկությունների կամ պաշտոնի իջեցումների։ The Washington Post-ի տվյալներով՝ հանդիպումը կլինի Հեգսեթի կողմից ռազմական ղեկավարության համար անցկացվելիք երեք դասախոսություններից առաջինը։ Երկրորդը կկենտրոնանա պաշտպանական արդյունաբերական բազայի վրա, իսկ երրորդը, որը սպասվում է դեկտեմբերին Կալիֆոռնիայում, կկենտրոնանա զսպման հարցերի վրա։
The Washington Post-ն ավելի վաղ գրել էր, որ Հեգսեթի՝ գեներալներին շտապ հավաքելու հրամանը «չափազանց արտասովոր» էր։ Նույնիսկ հիմնական ռազմական առաջնորդներն ու նրանց օգնականները տեղյակ չէին պատճառներից։
Պաշտոնը ստանձնելուց ի վեր նախարարն արդեն ազատել է մի քանի բարձրաստիճան զինվորականների, դրանց թվում՝ Շտաբների պետերի միացյալ կոմիտեի նախկին նախագահ Չարլզ Բրաունին: Ավելի վաղ Պենտագոնի նախկին մամուլի քարտուղար Ջոն Էլիոթը Politico-ում գրել էր, որ արտահոսքի սկանդալների և մի շարք ազատումների պատճառով գերատեսչությունում «լիակատար քաոս» է տիրում: Նա միաժամանակ կասկած է հայտնել, թե Հեգսեթը երկար կմնա պաշտոնում: Սակայն Սպիտակ տունը հերքել է նրան փոխարինողի որոնման մասին լուրերը:
