Ուկրաինայի և ԱՄՆ-ի միջև հարաբերություններում էական շրջադարձ է տեղի ունենում։ Առ այսօր ռուսական ագրեսիան հետ մղելու համար անհրաժեշտ զենքի մատակարարումները կատարվում էին մեկ ուղղությամբ՝ Ամերիկայից դեպի Կիև։ Մինչդեռ հիմա Կիևը կարող է Ամերիկային մարտական ​​պայմաններում փորձարկված անօդաչու թռչող սարքերի տեխնոլոգիաներ առաջարկել։ Եվ ոչ միայն առաջարկել այն, այլև կնքել գործարք, ինչպես նախընտրում է Դոնալդ Թրամփը։

Ուկրաինացի պաշտոնյաների և զինվորականների մի խումբ այս շաբաթ Վաշինգտոնում բանակցություններ է սկսել նախագահի վարչակազմի հետ՝ համաձայնագրի շուրջ, որը անօդաչու թռչող սարքերի տեխնոլոգիաներ կտրամադրի՝ ռոյալթիների (պարբերական փոխհատուցում) կամ այլ վճարի դիմաց, գրում է The Wall Street Journal-ը՝ հղում անելով երկու երկրների պաշտոնյաներին։ Ինչպես Թրամփը, այնպես էլ Վլադիմիր Զելենսկին աջակցել են գործարքին։ Դրա արժեքը կարող է հասնել միլիարդավոր դոլարների, պարբերականին հայտնել է ամերիկացի պաշտոնյան։ Նա հավելել է, որ եթե կողմերը սկզբունքային համաձայնության հասնեն, կոնկրետ մանրամասները քննարկելու համար ամիսներ կպահանջվեն։

ԱՄՆ-ն արտադրում է բարդ անօդաչու թռչող սարքեր, բայց Ուկրաինան շատ ավելի առաջ է մարտական ​​պայմաններում իրենց արդյունավետությունն ապացուցած ցածրարժեք անօդաչու թռչող սարքերի (ԱԹՍ) զանգվածային արտադրության մեջ։ Ուկրաինան պատրաստ է կիսվել անօդաչու թռչող սարքերի արտադրության և օգտագործման իր հարուստ փորձով։ Պենտագոնի և Պետքարտուղարության ներկայացուցիչների հետ բանակցությունները սկսվել են երեքշաբթի՝ Ուկրաինայի պաշտպանության փոխնախարար Սերգեյ Բոևի գլխավորած պատվիրակության մասնակցությամբ։

Ամերիկյան UA1 ռիսկային կապիտալի հիմնադրամը ներդրումներ է կատարել ուկրաինական ութ պաշտպանական ընկերություններում, և դրա գործընկեր Ուիլյամ ՄըքՆալթին խոստովանում է.

Այն, որ ԱՄՆ-ում կարիք ունենք ուկրաինական անօդաչու թռչող սարքերի տեխնոլոգիաների, ընդամենն իրականություն է։

ԱՄՆ վարչակազմի մեկ այլ պաշտոնյա Wall Street Journal-ին հայտնել է, որ անօդաչու թռչող սարքերի գործարքը ամերիկյան զորքերին հնարավորություն կտա անօդաչու թռչող սարքերի տեխնոլոգիայի ոլորտում օգտվել Ուկրաինայի մրցակցային առավելություններից։ Կիևը, իր հերթին, ձգտում է ձեռք բերել բարձր տեխնոլոգիական ամերիկյան զենք, հավելել է պաշտոնյան՝ նկատի ունենալով Patriot հակահրթիռային համակարգը, HIMARS հրթիռային կայանքները, հեռահար հրթիռներ արձակող ATACMS համակարգերը և բազմաֆունկցիոնալ կործանիչը։

Անօդաչու թռչող սարքերի գործարքը կարող է դառնալ «մեգա գործարք» ներառող ռազմական փաթեթի մի մասը, որի շրջանակում, ինչպես անցյալ շաբաթ հայտարարել է Զելենսկին, Ուկրաինան հույս ունի Միացյալ Նահանգներից տասնյակ միլիարդավոր դոլարների արժողությամբ զենք գնել, ներառյալ՝ հեռահար հրթիռներ, որոնք նրան հնարավորություն կտան ավելի հզոր հարվածներ հասցնել Ռուսաստանի տարածքին։