ԱՄՆ զինված ուժերը երեքշաբթի օրը հայտարարել են, որ անցյալ շաբաթ Սիրիայում ավիահարված են հասցրել, որի արդյունքում սպանվել է «Ալ-Քաիդայի» բարձրաստիճան անդամ, հաղորդում է Al Arabiya-ն։

«Մերձավոր Արևելքում գտնվող ԱՄՆ ուժերը շարունակում են մնալ այն դիրքում, որտեղից կարող են ավերել և չեզոքացնել ահաբեկչական բոլոր ջանքերը՝ հարձակումներ պլանավորելու, կազմակերպելու և իրականացնելու համար», - ասել է ԱՄՆ Կենտրոնական հրամանատարության (CENTCOM) ղեկավար, ծովակալ Բրեդ Քուփերը։

ԱՄՆ կենտրոնական հրամանատարությունը հայտարարել է, որ Մուհամմադ Աբդելվահաբ ալ-Ահմադը «Անսար ալ-Իսլամ» ահաբեկչական խմբավորման անդամ է եղել, որը կապված է «Ալ-Քաիդայի» հետ: Հարվածը տեղի է ունեցել հոկտեմբերի 2-ին:

Մի քանի օր առաջ ԱՄՆ պաշտպանության նախարարության բարձրաստիճան պաշտոնյան հայտարարել էր, որ ԱՄՆ զինված ուժերը կենտրոնանում են Սիրիայից եկող Իսլամական Պետության (ԻՊ) սպառնալիքի վրա՝ միաժամանակ ամրապնդելով Իրաքում գտնվող բազաները և վերատեղակայվելով Էրբիլում: Չնայած այն բանին, որ ԻՊ-ի թվաքանակը նվազել է տասը տարի առաջվա գագաթնակետի համեմատ, այն, այնուամենայնիվ, շարունակում է զինյալներ և օպերատիվ ներուժ պահպանել Սիրիայի տարածքում

Պենտագոնը գնահատում է, որ այնտեղ ներկայումս ԻՊ-ի մոտ 9000 զինյալ է պահվում, իսկ ճամբարներում այս պահին կա մոտ 29000 տեղահանված անձ, որոնք վտանգ են ներկայացնում արմատականացման և հավաքագրման տեսանկյունից։