Վենեսուելացի պաշտոնյաները, ձգտելով վերջ դնել Միացյալ Նահանգների հետ առճակատմանը, Դոնալդ Թրամփի վարչակազմին առաջարկել են մեծ բաժնեմաս երկրի նավթի եւ այլ հանքավայրերում: Բանակցությունները, ըստ նրանց մոտ կանգնած մի քանի աղբյուրների, տեւել են ամիսներ, տեղեկացրել է The New York Times-ը: Այս առաջարկը մնացել է սեղանին նույնիսկ այն բանից հետո, երբ Թրամփի վարչակազմը Նիկոլաս Մադուրոյի կառավարությունն անվանել է «թմրաահաբեկչական ​​կարտել», ռազմանավեր ուղարկել Կարիբյան ավազան եւ սկսել ոչնչացնել այն նավերը, որոնք, ըստ ԱՄՆ իշխանությունների, թմրանյութեր էին տեղափոխում Վենեսուելայից:

Այդ առաջարկների համաձայն՝ Մադուրոն պատրաստ էր բացել նավթի եւ ոսկու արդյունահանման նախագծերն ամերիկյան ընկերությունների համար, նրանց տրամադրել առաջնահերթ պայմանագրեր, վերահասցեագրել նավթի հոսքերը Չինաստանից Միացյալ Նահանգներ եւ վերանայել ապրանքային համաձայնագրերը Չինաստանի, Իրանի եւ Ռուսաստանի հետ։

Վենեսուելան օրական արտադրում է մոտ 1 միլիոն բարել նավթ Ուգո Չավեսի օրոք արտադրվող 3 միլիոնի փոխարեն։ Մատակարարումների մեծ մասը գնում է Չինաստան, բացառությամբ մոտ 100 000 բարելի, որը Chevron-ը վաճառում է Միացյալ Նահանգներին։ Մասնագետները կարծում են, որ արտասահմանյան կապիտալի ներհոսքի դեպքում արտադրությունը կարող է զգալիորեն աճել։

Մադուրոն փորձել է կապեր հաստատել ամերիկյան բիզնեսի հետ։ Վենեսուելայի պետական ​​նավթային ընկերությունը իր համատեղ նախագծերի լիակատար վերահսկողությունը փոխանցել է Chevron-ին, քննարկվել է նաեւ ընկերության բաժնեմասի հարցը մեկ այլ խոշոր հանքավայրում։ Բանակցություններ էին ընթանում նաեւ ConocoPhillips-ի հետ, որը լքեց երկիրը 2007թ․ ակտիվների ազգայնացումից հետո։

Բանակցությունները մոտեցան առաջընթացին մայիսին։ Որպես բարի կամքի նշան՝ ԱՄՆ հատուկ դեսպանորդ Ռիչարդ Գրենելն օգնել է Վենեսուելա վերադարձնել ծնողների արտաքսումից հետո ԱՄՆ-ում մնացած երեխային։ Կարակասը շուտով ազատ է արձակել ամերիկյան ռազմաօդային ուժերի ձերբակալված վետերանին եւ հանձնել նրան Գրենելին։

Սակայն Թրամփի վարչակազմը, ի վերջո, մերժեց Մադուրոյի տնտեսական զիջումները եւ անցյալ շաբաթ կասեցրեց դիվանագիտական ​​կապերը՝ փաստացի թաղելով գործարքը։ Դիվանագիտական ​​​​փլուզման պայմաններում ԱՄՆ-ը մեծացրեց ռազմական ներկայությունը տարածաշրջանում եւ շարունակեց կոշտ հռետորաբանությունը։ Երկու երկրներում էլ շատերը կարծում են, որ Վաշինգտոնի իրական նպատակը Մադուրոյին հեռացնելն է։

Պետքարտուղար եւ ազգային անվտանգության գծով խորհրդական Մարկո Ռուբիոն դարձել է կոշտ մոտեցման առաջատար կողմնակիցը։ Նա Մադուրոյին անվանել է «ամերիկյան արդարադատությունից փախստական» եւ անօրինական առաջնորդ՝ քննադատելով Վենեսուելայի հարցում դիվանագիտական ​​​​ջանքերը։ Բանակցությունների կողմնակիցներն ընդունում են, որ Ռուբիոյի գիծը գերակշռել է, եւ Պենտագոնը քննարկում է Վենեսուելայի դեմ ռազմական սցենարները։

Թրամփն արդեն բացահայտ քննարկել է Կարիբյան տարածաշրջանում ռազմական արշավի հնարավորությունը: «Մենք սկսել ենք օգտագործել ԱՄՆ զինված ուժերի հզորությունը՝ Նիկոլաս Մադուրոյի գլխավորած վենեսուելացի ահաբեկիչներին եւ թմրանյութերի ապօրինի շրջանառության ցանցերը ոչնչացնելու համար»,- ասել է նա ՄԱԿ Գլխավոր ասամբլեայում: Հուլիսին Թրամփը ստորագրել է գաղտնի հրամանագիր, որը թույլատրում է ուժի կիրառումը թմրամիջոցների կարտելների դեմ: Տարածաշրջանում ամերիկյան զորքերի թիվն ավելացվել է 6 500-ով, եւ Կարիբյան ավազանում տեղակայվել է ԱՄՆ ռազմածովային նավատորմ: Միաժամանակ, Վաշինգտոնը պատրաստվում է իշխանափոխության Վենեսուելայում: Մայիսին Ռուբիոն հանդիպել է ընդդիմության առաջնորդների, այդ թվում՝ Մարիա Կորինա Մաչադոյի հետ: Նրա թիմը մշակել է «Մադուրոյից 100 ժամ անց» ծրագիրը, որը նախատեսում է իշխանության փոխանցում 2024թ․ ընտրություններում նախագահի թեկնածու Էդմունդո Գոնսալեսին:

Մարիա Կորինա Մաչադոն նույնպես Վաշինգտոնում ներկայացրել է իր սեփական տնտեսական ծրագիրը՝ պնդելով, որ քաղաքական անցում սկսելով՝ Միացյալ Նահանգները 15 տարվա ընթացքում կշահի 1.7 տրիլիոն դոլար։ Հոկտեմբերի 10-ին Մաչադոն արժանացավ 2025թ․ Խաղաղության Նոբելյան մրցանակի։ Մրցանակը շնորհվել է «Հանուն Վենեսուելայի ժողովրդի ժողովրդավարական իրավունքները պաշտպանելու եւ բռնապետությունից ժողովրդավարության արդար ու խաղաղ անցման հասնելու նրա անխոնջ աշխատանքի համար»։