Նախընտրելի
ԱՄՆ նախագահ Դոնալդ Թրամփի վարչակազմը Ջո Բայդենի կողմից մահապատիժը ցմահ ազատազրկմամբ փոխարինված բանտարկյալներին ուղարկել է Կոլորադո նահանգի Ֆլորենս բանտը՝ դաշնային համակարգի ամենախիստ ուղղիչ գաղութը։ Այս մասին ասվում է The Wall Street Journal-ի հոդվածում։
2024 թվականի դեկտեմբերին, նախագահի պաշտոնը թողնելիս, Ջո Բայդենը մեղմացրել է 37 դատապարտյալների համար սահմանված պատիժը, ներառյալ սպանության մեղադրանքներով դատապարտվածների պատիժը, որոնց դաշնային դատարանները դատապարտել էին մահապատժի։ Նա նրանց պատիժը փոխարինել է ցմահ ազատազրկմամբ՝ առանց պայմանական վաղաժամկետ ազատման հնարավորության։
Թրամփը քննադատել է այդ որոշումը՝ մաղթելով այդ 37 «ամենադաժան հանցագործներին, որոնք սպանել, բռնաբարել և թալանել են»՝ «գնալ դժոխք»։
Ինչպես գրում է The Wall Street Journal-ը, նախագահի պաշտոնը ստանձնելուց մի քանի ժամ անց Թրամփը հրամայել է այդ մարդկանց համար ցմահ ազատազրկումը «ըստ էության, դժոխքի» վերածել։ Արդյունքում, ամերիկացի պաշտոնյաները չեղարկել են 37 դատապարտյալներից մեծամասնությանը սովորական խիստ ռեժիմի բանտեր տեղափոխելու ծրագրերը, որտեղ պահվում են ցմահ դատապարտվածները։ Դրա փոխարեն, Էմիլ Բովեն, որն այդ պահին կատարում էր գլխավոր դատախազի տեղակալի պարտականությունները, կարգադրել է նրանց մեծ մասին տեղավորել Կոլորադոյի Ֆլորենս բանտում։ Բացառություն են կազմել միայն այն դատապարտյալները, որոնք մասնագիտացված բուժման կարիք ունեն։
Այս բանտը, ինչպես բացատրում է WSJ-ն, նախատեսված է «ամենադաժան հանցագործների» համար։ Բանտարկյալները սովորաբար օրական 23 ժամ են անցկացնում այնտեղ՝ միայնակ մնալով իրենց խցերում։ Ստանդարտ առավելագույն անվտանգության բանտերում կալանավորները ժամանակ ունեն հանգստի, կրթության, այլ կալանավորների հետ շփվելու և լավ վարքի համար ավելի ցածր անվտանգության հաստատություններ տեղափոխվելու հնարավորության համար։
Թերթի տվյալներով՝ 2025 թվականի մայիսին գլխավոր դատախազ Փեմ Բոնդիի հետ հանդիպման ժամանակ վարչակազմի որոշ պաշտոնյաներ ցանկություն են հայտնել, որ Ֆլորենս բանտում պայմաններն ավելի խիստ լինեն։
