ԱՄՆ փոխնախագահ Ջեյ Դի Վենսը բանակցությունների ընթացքում Իսրայելի վարչապետ Բենիամին Նեթանյահուին խնդրել է «շանս և ժամանակ տալ, որպեսզի իրականացնեն ամեն ինչ» Գազայի հատվածում հակամարտության կարգավորման խաղաղ համաձայնագրի հաջորդ փուլերին անցնելու համար։ Այս մասին հայտնել է Axios պորտալը՝ հղում անելով ամերիկյան երկու բարձրաստիճան դիվանագետների և իսրայելցի պաշտոնյայի։

Հոկտեմբերի 22-ի բանակցությունների ժամանակ Վենսը նաև Նեթանյահուից խնդրել է առավելագույն համագործակցություն ցուցաբերել և ընդգծել է Վաշինգտոնի մտահոգությունների որոշակի ասպեկտներ, որոնք կարող են խափանել խաղաղության համաձայնագիրը: Մասնավորապես, քննարկումը կենտրոնացած էր ՀԱՄԱՍ-ի կողմնակիցների դեմ հարվածների վրա՝ ի պատասխան շաբաթավերջին իսրայելական զորքերի վրա հարձակումների, ինչպես նաև Իսրայելի կառավարության կողմից Գազայի մարդասիրական օգնության մատակարարման սահմանափակումների վրա: Վենսը կոչ է արել իսրայելական կողմին զսպվածություն ցուցաբերել:

Ըստ պորտալի աղբյուրների, Նեթանյահուն ԱՄՆ փոխնախագահին հայտնել է, որ Իսրայելը հավատարիմ կմնա խաղաղ համաձայնագրի շրջանակներին և հույս ունի, որ մոտ ապագայում կողմերին կհաջողվի անցնել խաղաղ գործարքի հաջորդ փուլերին։ Ընդ որում, ինչպես նշել են ամերիկացի դիվանագետները, բանակցություններից առաջ Նեթանյահուն թերահավատություն էր հայտնել համաձայնագրի շրջանակներում հաջորդ քայլերի իրականացմանն անցնելու հնարավորության վերաբերյալ։

Axios-ը նշում է, որ բանակցությունների արդյունքներով Սպիտակ տունը գոհունակություն է հայտնել դեպքերի ներկայիս դրությունից։ ԱՄՆ նախագահ Դոնալդ Թրամփի վարչակազմը կարծում է, որ իրենց հաջողվել է Գազայի իրավիճակը պահել թույլատրելի շրջանակներում, առանց սրման։