նախընտրելի դարձնել
Սպիտակ տան պաշտոնյաներն առաջարկել են պաղեստինյան ՀԱՄԱՍ շարժման ղեկավարությանն ապահովել իրենց զինված ուժերի անվտանգ անցումը Գազայի հատվածի՝ Իսրայելի կողմից վերահսկվող տարածքներից դեպի արմատականների կողմից վերահսկվող տարածքներ, հաղորդել է Axios-ը՝ հղում կատարելով աղբյուրներին։
Ըստ աղբյուրների՝ ամերիկյան առաջարկը նախատեսված է՝ խուսափելու համար հրադադարի խափանման եւ ՀԱՄԱՍ-ի կողմնակիցների ու իսրայելական բանակի միջեւ զինված բախումների վերսկսման ռիսկից։ Առաջարկը փոխանցվել է ամերիկյան կողմից եգիպտական եւ կատարյան միջնորդների միջոցով։
Իսրայելի պաշտպանության բանակի աղբյուրները պորտալին հայտնել են, որ ՀԱՄԱՍ-ի մի քանի տասնյակ զինված կողմնակիցներ դեռեւս մնում են իսրայելական ուժերի կողմից վերահսկվող տարածքների ստորգետնյա թունելներում։
Հոկտեմբերի 9-ին Իսրայելը եւ ՀԱՄԱՍ-ը, Եգիպտոսի, Կատարի, ԱՄՆ եւ Թուրքիայի միջնորդությամբ, համաձայնեցին իրականացնել ԱՄՆ նախագահ Դոնալդ Թրամփի ներկայացրած խաղաղության ծրագրի առաջին փուլը։ Գազայում հրադադարը ուժի մեջ է մտել հոկտեմբերի 10-ին։ Հոկտեմբերի 28-ի երեկոյան Իսրայելի վարչապետ Բենիամին Նեթանյահուն հրամայեց խոշոր հարվածներ հասցնել Գազայի հատվածին, այն բանից հետո, երբ ՀԱՄԱՍ-ի կողմնակիցները, ըստ իսրայելական պետության, խախտել են հրադադարը՝ կրակելով զինվորների վրա Գազայի հատվածի հարավային Ռաֆահ շրջանում։ Բանակը պատասխանել է անկլավում գտնվող մի քանի ռազմական օբյեկտների վրա հարձակվելով։ ՀԱՄԱՍ-ը հերքել է Ռաֆահի միջադեպին մասնակցությունը եւ հավատարիմ է մնացել հրադադարի համաձայնագրին: Պաղեստինյան անկլավի առողջապահության նախարարության տվյալներով՝ Իսրայելի հարվածների հետեւանքով զոհվել է 104 եւ վիրավորվել 253 մարդ:
