նախընտրելի դարձնել
Արգենտինայի նախկին նախագահ Քրիստինա Ֆերնանդես դե Կիրշները հինգշաբթի դատարան է ներկայացել իր նախագահության տարիներին կնքված հանրային աշխատանքների պայմանագրերի հետ կապված կաշառակերության մեղադրանքով, հաղորդում է Reuters-ը։
«Նոթատետրեր» սկանդալային անվամբ հայտնի բարձրաստիճան կոռուպցիոն գործում Ֆերնանդեսը և 86 այլ նախկին պաշտոնյա մեղադրվում են անօրինական ցանցի մասնակցելու համար, որը, ենթադրաբար, կաշառք է ստացել գործարարներից՝ շահութաբեր պետական պայմանագրերի դիմաց։
Կիրշները չի ընդունում մեղադրանքները։
«Այսօր սկսվում է ևս մեկ ցուցադրական դատավարություն,- ասել է նախկին նախագահը Channel X-ի եթերում։- Նրանք պետք է շարունակեն այս դատական օպերետը՝ ճնշումը պահպանելու և, ամենակարևորը, ուշադրությունը շեղելու համար»։ Ֆերնանդեսը, որը երկրի նախագահ է եղել երկու ժամկետ՝ 2007-ից 2015 թվականներին, ինչպես նաև փոխնախագահ, սենատոր և առաջին տիկին է եղել, հունիսից տնային կալանքի տակ է խարդախության առանձին մեղադրանքով։ Մեղադրողները հինգշաբթի սկսել են կարդալ մեղադրական եզրակացությունը՝ նշանավորելով դատավարության առաջին փուլի սկիզբը, որը, ինչպես սպասվում է, կտևի մինչև տարեվերջ։
Վերջնական որոշումը կարող է տարիներ տևել՝ սպասվող բողոքարկումների պատճառով: Գործը ջրի երես է դուրս եկել 2018 թվականին, երբ հայտնվեցին նախկին պաշտոնյայի վարորդի պահած տետրերը, որոնցում մանրամասն նկարագրվում էին ենթադրյալ կանխիկի մատակարարումները և հանդիպումները: Վկաները Ֆերնանդեսին և նրա հանգուցյալ ամուսնուն՝ 2003-ից 2007 թվականներին պաշտոնավարած նախկին նախագահ Նեստոր Կիրշներին մատնանշում են որպես սխեմայի կենտրոնական դեմքեր: Մեղադրյալների թվում են շինարարական, նախկին նախարարներ և էներգետիկայի ու տրանսպորտային խոշոր ընկերությունների ղեկավարներ: Մի քանի բիզնես առաջնորդներ ցուցմունք են տվել՝ մեղմացուցիչ հանգամանքների դիմաց՝ բացահայտելով պերոնիստական շարժման ֆինանսավորման համար ենթադրաբար օգտագործվող կաշառքների համակարգը:
Դատավարությունն անցկացվում է վիրտուալ՝ Zoom-ով:
Անցյալ շաբաթ նախագահ Խավիեր Մայլիի ազատական կուսակցությունը հաղթեց միջանկյալ խորհրդարանական ընտրություններում՝ ամրապնդելով նրա մանդատը տնտեսական լայնածավալ բարեփոխումները շարունակելու համար:
