նախընտրելի դարձնել
Իրանն ու Քուվեյթն անցկացրել են իրենց առևտրային համագործակցության հանձնաժողովի 13-րդ նիստը, որն առաջինն էր 12 տարվա ընթացքում՝ վերահաստատելով իրենց հանձնառությունը տնտեսական, առևտրային և ներդրումային կապերը ամրապնդելու հարցում, հաղորդում է Mehr-ը։
Չորեքշաբթի ավարտվել է Իրան-Քուվեյթ առևտրային համագործակցության հանձնաժողովի 13-րդ նիստը, որը կազմակերպել էր Քուվեյթի առևտրի և արդյունաբերության նախարարությունը, որի մասնակիցները քննարկել են սննդի անվտանգության հարցեր։
Հանդիպման ընթացքում Քուվեյթի առևտրի և արդյունաբերության փոխնախարարի պաշտոնակատար Մարվա ալ-Հուայդանը և Իրանի արդյունաբերության, հանքերի և առևտրի փոխնախարար Մոհամմադ-Ալի Դեհղան-Դեհնավին համագործակցության վերջնական փաստաթուղթ են ստորագրել։
Ալ-Հուայդանը նշել է, որ բանակցությունները կենտրոնացած են եղել սննդի անվտանգության վրա՝ հավելելով, որ նախաձեռնության նպատակն է մատակարարման շղթայի դիմացկունության ապահովումն ու երկու երկրի միջև փոխանակվող սննդամթերքի անվտանգության բարելավումը։
Նա հայտնել է նաև, որ քննարկվել են առևտրի, տնտեսության, ներդրումային և տրանսպորտային ոլորտներում համագործակցության զարգացման հետ կապված հարցեր։
Երկու կողմն էլ ընդգծել են արդյունաբերական համագործակցության ընդլայնման, մասնագիտական վերապատրաստման և որակավորված անձնակազմի զարգացման գործում փորձի փոխանակման կարևորությունը: Փակման արարողությանը ներկա էին Քուվեյթում Իրանի դեսպան Մոհամմադ Տոտոնչին, ինչպես նաև երկու երկրի մի շարք մաքսային և նավահանգստային պաշտոնյաներ:
