Pաղեստինյան ՀԱՄԱՍ արմատական շարժումը եւ նրա ստեղծած վարչական մարմիններն ամրապնդում են իրենց վերահսկողությունը Գազայի հատվածի այն տարածքների նկատմամբ, որոնք Իսրայելի ուժերը լքել են հրադադարի համաձայնագրի համաձայն։ Այս մասին հաղորդել է Reuters-ը՝ հղում կատարելով պաղեստինյան աղբյուրներին եւ վերլուծաբաններին։

Նա տվյալներով՝ ՀԱՄԱՍ-ի վարչական եւ անվտանգության ուժերը նոր մաքսատուրքեր են սահմանում մասնավոր ներմուծվող ապրանքների, այդ թվում՝ վառելիքի եւ ծխախոտի վրա, այն տարածքներում, որոնք նրանք վերահսկում են՝ իրենց սեփական բյուջեն լրացնելու համար։ Միեւնույն ժամանակ, նրանք գնային վերահսկողություն են սահմանում խանութներում եւ շուկաներում վաճառվող սննդի եւ այլ ապրանքների վրա, տուգանքներ են սահմանում առեւտրականների նկատմամբ։ Հրադադարի հաստատումից հետո ՀԱՄԱՍ-ի արմատականները նաեւ մահապատժի են ենթարկել մի քանի տասնյակ պաղեստինցիների, որոնք մեղադրվում են Իսրայելի հետ համագործակցելու մեջ։

Ինչպես նշում են պաղեստինցի գործարարները, ՀԱՄԱՍ-ը վերահսկում է իր տարածք մտնող ամեն ինչ, ճանապարհների երկայնքով անցակետեր է տեղադրում եւ բեռնատարներ է կանգնեցնում ստուգման համար։ Միեւնույն ժամանակ, ընդհանուր առմամբ գները մնում են բարձր, վկայում են տեղական բիզնեսի հարցազրույց տված ներկայացուցիչները։ ՀԱՄԱՍ-ի կողմից վերահսկվող վարչակազմի խոսնակ Իսմայիլ ալ-Թավաբտան հերքել է Գազայում նոր մաքսատուրքերի սահմանումը։

Reuters-ի հարցմանը ենթարկված վերլուծաբանները վախենում են, որ ԱՄՆ նախագահ Դոնալդ Թրամփի խաղաղության ծրագրի հաջորդ փուլի իրականացման հետաձգումները, որը նախատեսում է անցումային վարչակազմի ստեղծում, կարող են ամրապնդել ՀԱՄԱՍ-ի դիրքերը եւ մոտեցնել Գազայի հատվածի բաժանման սցենարը։ Վաշինգտոնի Մերձավոր Արեւելքի քաղաքականության ինստիտուտի ավագ գիտաշխատող Գեյթ ալ-Օմարիի խոսքով՝ արմատականների գործողությունները նպատակ ունեն անկլավի բնակիչներին եւ արտաքին խաղացողներին ցույց տալ, որ ՀԱՄԱՍ-ը պետք է հաշվի առնվի խաղաղության ծրագրի իրականացման գործում, եւ փոխզիջումների գնալ՝ շարժման քաղաքական ազդեցությունը պահպանելու համար։