Trump Mobile ընկերությունը, որը հանդիսանում է ԱՄՆ նախագահի Trump Organization կոնգլոմերատի մասը, հետաձգել է ոսկյա կորպուսով բջջային հեռախոսի թողարկման ծրագրերը մինչև 2026 թվականը: Այս մասին հայտնել է բրիտանական Financial Times (FT) թերթը:

Ըստ պարբերականի տվյալների՝ հեռախոսի թողարկումը հետաձգվում է հոկտեմբերին ԱՄՆ կառավարության աշխատանքի դադարեցման («շաթդաուն») պատճառով, ինչը հանգեցրել է մատակարարումների ուշացման: Բացի այդ, առկա է «բարձր հավանականություն», որ սարքերը «չեն առաքվի նաև այս ամսվա ընթացքում»:

2025 թվականի հունիսին ենթադրվել է, որ Trump Organization-ը օգոստոսին կսկսի սեփական T1 Phone սմարթֆոնի վաճառքը, որը պետք է թողարկվեր ոսկյա կորպուսով: Այդ սարքը պետք է արտադրվեր Միացյալ Նահանգներում: Բացի այդ, ընկերությունը հայտարարել էր բջջային կապի ոլորտում ծառայությունների մատուցման մեկնարկի մասին:

Trump Organization-ը կոնգլոմերատ է, որը գործում է մասնավորապես շինարարության, հյուրանոցային բիզնեսի և զվարճանքների ինդուստրիայի ոլորտներում: Ընկերությունը պատկանում է ԱՄՆ նախագահ Դոնալդ Թրամփին: Այն ղեկավարում են ամերիկյան առաջնորդի որդիները՝ Դոնալդը և Էրիկը: