Տաջիկստանը հայտնել է Աֆղանստանի հետ պետական սահմանին չորս ահաբեկչի վնասազերծման մասին, հայտնում է «Ховар»-ը:

Ըստ լրատվամիջոցի հաղորդման, այս գիշեր ահաբեկիչների մի խումբ հատել է երկրի սահմանը Աֆղանստանի Դարբանդակ գյուղից՝ «Խիրմանջո» սահմանային կետի մոտ: Նշվում է, որ երբ ահաբեկիչները հայտնաբերվել են, չեն ենթարկվել հանձնվելու մասին սահմանապահների հրամաններին և զինված դիմադրություն են ցույց տվել: Մարտական գործողությունների ընթացքում բոլոր չորս ահաբեկիչները «վնասազերծվել են»:

Դեպքի վայրից առգրավվել է «Կալաշնիկով» տեսակի 3 հրազեն, օտարերկրյա արտադրության «Կրուզ» մակնիշի 1 հրացան, 6 պահունակ, Կալաշնիկովի ինքնաձիգի և ատրճանակների 183 փամփուշտ, 3 բջջային հեռախոս, 1 ռացիա և 1 նավակ:

Ներկայումս պետական սահմանին իրավիճակը վերահսկվում է:

Փաստի առթիվ Տաջիկստանի քրեական օրենսգրքի 179 (Ահաբեկչություն), 335 (Տաջիկստանի Հանրապետության պետական սահմանի ապօրինի հատում), 195 (Զենքի, ռազմամթերքի, պայթուցիկ նյութերի և պայթուցիկ սարքերի ապօրինի ձեռքբերում, օտարում, պահպանում, փոխադրում, կրում) հոդվածներով հարուցվել է քրեական գործ, կատարվում է քննություն: