ՆախընտրելիՀաքերների Anonymous խմբավորումը գրոհի է ենթարկել ԱՄՆ Կենտրոնական հետախուզական վարչության (ԿՀՎ) կայքը: Twitter միկրոբլոգների կայքում @YourAnonNews-ը հայտարարություն է տեղադրել` «CIA Tango down», CIA-ը ԿՀՎ-ի հապավումն է անգլերենով, իսկ Tango down-ն արտահայտություն է, որի օգնությամբ ԱՄՆ-ի հատուկ ծառայությունները հայտնում են թշնամական օբյեկտի վերացման մասին:
Հաքերները չեն հստակեցրել, թե որն է դարձել հարձակման պատճառը: Հետախուզական ծառայության ներկայացուցիչները դեռեւս չեն մեկնաբանել այս պատահարը, հաղորդում է «ՌԻԱ Նովոստին»: Cia.gov կայք մտնել դեռեւս չի հաջողվում:
Սա Anonymous-ի առաջին հարձակումը չէ ամերիկյան պետհաստատությունների կայքերի վրա: Անցյալ ամիս նրանց հաջողվել էր մի կարճ ժամանակով շարքից հանել ԱՄՆ-ի արդարադատության նախարարության եւ Հետաքննթյունների դաշնային բյուրոյի (ՀԴԲ) կայքերը: Այդ հարձակումներով հաքերները պատասխանել են Megaupload ֆայլերի փոխանակման կայքի փակմանը:
Anonymous խումբը հանրահայտ է դարձել 2010 թվականի վերջին, երբ DDoS-հարձակումների շարք էին կազմակերպել WikiLeaks-ի (այն ժամանակ տուժել էին PayPal-ը, Visa-ն եւ MasterСаrd-ը) գործունեությանը խոչընդոտող ընկերությունների եւ կազմակերպությունների կայքերի վրա: LulzSec խմբի համախոհների հետ միավորված կիբերհանցագործների թիրախ են դարձել նաեւ Sony, Nintendo, PBS ընկերությունների կայքերը, ԱՄՆ-ի Սենատի կայքը, Բրազիլիայի, Մեքսիկայի, Իտալիայի կառավարական կայքերը:
