PLoS One հանդեսը հետ է կանչել դրիասյան ցրտեցմանը նվիրված երկու հնչեղ հոդված։ Հեղինակները պնդում էին, թե 12,9 հազար տարի առաջ Երկրին գիսաստղ է բախվել, ինչն էլ իբր հանգեցրել է հին հնդկացիների առաջին հանրույթի՝ Կլովիս մշակույթի կործանմանը: Հետկանչի մասին տեղեկությունը հրապարակվել է պարբերականի կայքում:

Այս որոշումն ընդունվել է ոլորտի փորձագետների հետ մի շարք խորհրդակցություններից հետո: Ըստ Planet Today-ի, պատճառներն են գրականության ցանկը կազմելիս արհեստական բանականության հավանական կիրառումը, ինչպես նաև փաստացի սխալներն ու մեթոդաբանական թերությունները: Օրինակ՝ հոդվածներից մեկում ծովային ջրիմուռների խեցիները ներկայացվել են որպես երկնային մարմնի անկման հետքեր:

Կրտսեր (ուշ) դրիասը մոտ 12,9 հազար տարի առաջ տեղի ունեցած կտրուկ ցրտեցման դարաշրջան է, որն ուղեկցվել է սառցադաշտերի առաջխաղացմամբ: Ենթադրվում է, որ կլիմայական աղետները կործանել են Հյուսիսային Ամերիկայի մեգաֆաունան, այդ թվում՝ մաստոդոնտներին ու սվինատամ կատուներին, ինչպես նաև հանգեցրել են Կլովիս մշակույթի անկմանը:

Նախկինում մասնագետների մեծ մասը ցրտեցումը բացատրում էր բնական կլիմայական պատճառներով: 21-րդ դարի սկզբին առաջացավ գիսաստղի կամ խոշոր աստերոիդի անկման վարկածը: 2025 թվականի վերջին PLoS One-ում հրապարակվեց երկու հոդված, որոնց հեղինակները պատմում էին Բաֆինի ծովի հատակի և Կալիֆոռնիայի ափերի մոտ գտնվող Սանտա Ռոզա կղզու ապարների նմուշներում գիսաստղի փոշու մասնիկների և քվարցի դեֆորմացված հատիկների հայտնաբերման մասին:

Հրապարակումները բանավեճեր հրահրեցին երկրաբանների և մարդաբանների շրջանում: Խմբագրությունը նախաձեռնեց լրացուցիչ ստուգում՝ անկախ փորձագետների մասնակցությամբ: Վերլուծությունը ցույց տվեց նմուշների թվագրման և նյութերի ընտրության հետ կապված խնդիրներ. հետազոտողներն օգտագործել էին հողի նմուշների քվարցի հատիկների և փոշու մասնիկների միայն մի մասը, ինչը կարող էր ազդել արդյունքների վրա:

Այս կասկածները ստիպեցին հեռացնել երկու հոդվածները: Հեղինակների մեծ մասը չհամաձայնեց որոշման հետ, ինչը դրիասյան ցրտեցման «գիսաստղային» վարկածի շուրջ վեճերի նոր ալիք բարձրացրեց: