Նախընտրելի
Մեծ Բրիտանիան շուրջ 300 սահմանափակող միջոց է կիրառել ռուսական էներգետիկ և ֆինանսական ոլորտների, «ստվերային նավատորմի», ինչպես նաև երրորդ երկրների այն ընկերությունների նկատմամբ, որոնք օգնում են Ռուսաստանին ձեռք բերել ռազմական նշանակության արտադրանք։ «Միջազգային պատժամիջոցներն արդեն իսկ Պուտինին զրկել են ավելի քան 450 միլիարդ դոլարից՝ գումար, որը հավասար է նրա անօրինական պատերազմի երկու տարվա ծախսերին»,– ասված է Բրիտանիայի կառավարության հայտարարության մեջ։ «Արդեն մեկ տարի է՝ Ռուսաստանի տնտեսությունը գտնվում է լճացման մեջ, նրա եկամուտները կտրուկ նվազում են, ընդ որում՝ նավթի վաճառքից ստացված եկամուտները հասել են 2020 թվականից ի վեր ամենացածր մակարդակին։ Եկամուտների կորուստը փոխհատուցելու նպատակով Կրեմլը ստիպված է եղել բարձրացնել հարկերը շարքային ռուսաստանցիների համար, այդ թվում՝ ԱԱՀ-ն և շահութահարկը»։
Բրիտանական պատժամիջոցների տակ է հայտնվել «Տրանսնեֆտ»-ը՝ աշխարհի խոշորագույն նավթամուղային ընկերություններից մեկը, որը պատասխանատու է ռուսական նավթի արտահանման ավելի քան 80%-ի տեղափոխման համար։ Էներգետիկ թիրախների թվում են նաև «Ռոսատոմի» կառույցները, այդ թվում՝ «Ռուսատոմ Օվերսիզը», ինչպես նաև Ֆիննական ծոցի ափին գտնվող ՀԲԳ (հեղուկացված բնական գազ) գործարանները՝ «Գազպրոմ ՀԲԳ Պորտովայան» և «Կրիոգազ-Վիսոցկ ՀԲԳ-ն» («Նովատեկի» և Գազպրոմբանկի համատեղ ձեռնարկությունը)։
Պատժամիջոցների տակ են հայտնվել նաև 2Rivers ցանցի 175 ընկերություններ, որոնք փաստացի դարձել են ռուսական «ստվերային նավատորմի» լցանավերի գլխավոր օպերատորը։ Նախկինում այն կոչվում էր Coral. այն հիմնադրել են ադրբեջանցի գործարարներ Թահիրի Գարաևը և Էթիբար Էյյուբը։ Վերջինս մտերիմ է «Ռոսնեֆտի» ղեկավար Իգոր Սեչինի հետ, ով, ինչպես 2025 թվականին հայտնել էին բրիտանական իրավապահ և ֆինանսական մարմինները, Էյյուբին և Գարաևին ապահովում է «արտոնյալ հասանելիություն» ընկերության արտադրանքին։ Սև ցուցակում են հայտնվել նաև 48 լցանավեր, որոնք ներգրավված են եղել ռուսական նավթի տեղափոխման մեջ՝ շրջանցելով պատժամիջոցները։
Financial Times-ը բացահայտել է Էյյուբի և Գարաևի ցանցի մեջ մտնող առնվազն 48 ընկերություն՝ այն փաստի շնորհիվ, որ բոլորն օգտվել են միևնույն մասնավոր էլեկտրոնային փոստի սերվերից:
Մեծ Բրիտանիան հարված է հասցրել նաև բանկային հատվածին՝ պատժամիջոցների ցուցակում ներառելով «Պոչտա բանկը», «Տոչկա բանկը», Տրանսկապիտալբանկը, ինչպես նաև «Աբսոլյուտ», «Սինարա», «Ավերս», Լանտա-բանկ, «Ֆորա բանկ» և «Ակ-Բարս բանկ» բանկերը:
Պատժամիջոցներ են սահմանվել 49 կազմակերպությունների և ֆիզիկական անձանց նկատմամբ, որոնք «մասնակցում են Ռուսաստանի ռազմական մեքենայի սպասարկմանը, ներառյալ միջազգային մատակարարները, որոնք կենսական նշանակության ապրանքներ, բաղադրիչներ և տեխնոլոգիաներ են մատակարարում ռուսական անօդաչու թռչող սարքերի և այլ զինատեսակների համար, որոնք ահաբեկում են անմեղ ուկրաինացի քաղաքացիներին»,– ասված է հայտարարության մեջ: Սահմանափակող միջոցների տակ են հայտնվել ընկերություններ Չինաստանից, Հնդկաստանից, Թաիլանդից և ԱՄԷ-ից:
Ընդհանուր առմամբ, բրիտանական պատժամիջոցների ներքո այժմ գտնվում են ավելի քան 3000 ֆիզիկական անձինք, ընկերություններ և նավեր:
