Չեչնիայի Գուդերմես քաղաքի Կունդուխովո ավանում ավելի քան 500 մարդ է տարհանվել. բնակավայրը հեղեղվել է տևական հորդառատ անձրևների և Գումս գետի մակարդակի բարձրացման հետևանքով։ Այս մասին ТАСС-ին հայտնել են շրջանային վարչակազմից։

«Տևական հորդառատ անձրևների և Գումս գետի մակարդակի բարձրացման հետևանքով Գուդերմես քաղաքի Կունդուխովո ավանը հեղեղվել է։ Ըստ ներկայացված օպերատիվ տվյալների՝ 2026 թվականի մարտի 29-ի դրությամբ հեղեղման գոտուց տարհանվել է 504 մարդ, այդ թվում՝ 190 անչափահաս։ Տարերքի հետևանքով տուժել է 380 տնտեսություն և շուրջ 2 հազար մարդ»,- նշել է ТАСС-ի զրուցակիցը։

Ըստ նրա, հետևանքների վերացման աշխատանքներում ներգրավված է 671 մարդ, 24 միավոր հատուկ տեխնիկա և 1 ջրային միջոց։

«Իրավիճակի բարդացման պատճառով Գուդերմեսի մունիցիպալ շրջանի վարչակազմի կարգադրությամբ շրջանի տարածքում հայտարարվել է «Արտակարգ իրավիճակի» ռեժիմ, սահմանվել է արձագանքման մունիցիպալ մակարդակ»,- նշել են վարչակազմից։

Չեչնիայում բարձր պատրաստվածության ռեժիմ է սահմանվել հորդառատ անձրևների պատճառով, որոնք հանգեցրել են էլեկտրամատակարարման ընդհատումների, կամուրջների դեֆորմացիայի, հեղեղումների, ինչպես նաև սողանքների և քարաթափումների։ ԱԻՆ աշխատակիցները հասցեական օգնություն են ցուցաբերում, այդ թվում՝ ջրահեռացում են իրականացնում տնամերձ տարածքներից և նկուղներից։ Տարածաշրջանում մինչև մարտի 29-ի օրվա ավարտը շարունակում է գործել փոթորկի նախազգուշացումը։