Մեծ Բրիտանիայի Աբերիստուիտի համալսարանի հոգեբանների նոր հետազոտությունը ցույց է տվել, որ հումորը կարևոր դեր է խաղում 60 տարեկանից բարձր անձանց կյանքում, գրում է Phys.org-ը:

Այն օգնում է հաղթահարել ծերացման դժվարությունները, պահպանել սոցիալական կապերը և ամրապնդել հոգեհուզական վիճակը:

Գիտնականները խորացված հարցազրույցներ են անցկացրել Ուելսի, Շոտլանդիայի և Անգլիայի տարեց մասնակիցների հետ՝ հասկանալու համար, թե ինչպես են ծիծաղն ու հումորի զգացումը ազդում կյանքի որակի վրա ուշ տարիքում: Արդյունքները ցույց են տվել, որ հումորը պարզապես չի զվարճացնում. այն դառնում է դժվարությունների հաղթահարման մեխանիզմ, ներառյալ հարազատների կորուստը, առողջական խնդիրները և տարիքի հետ կապված վախերը:

Առաջատար հետազոտող Հիզեր Հիփը նշել է, որ շատ մասնակիցներ զգացել են, որ հումորն օգնում է պահպանել արժանապատվությունն ու տոկունությունը բարդ պահերին: Մասնակիցներից մեկն անգամ ասել է. «Եթե չծիծաղեի, ստիպված կլինեի լաց լինել»՝ ընդգծելով ծիծաղի հուզական կարևորությունը:

Հումորը նաև ամրապնդում է սոցիալական կապերը: Համատեղ կատակներն օգնում են տարեցներին ակտիվ մնալ հասարակության մեջ. դրանք մոտիվացնում են շփվելու, սեփական ապրումների մասին պատմելու և սեփական անձի մեջ չպարփակվելու ցանկությունը: Սա հատկապես կարևոր է ծերության ժամանակ, երբ զուգընկերների, ընկերների կորստի կամ սոցիալական ակտիվության նվազման պատճառով շատերը բախվում են մեկուսացման:

Հետաքրքիր է, որ տղամարդիկ և կանայք հումորն օգտագործում են տարբեր կերպ: Կանայք ավելի հաճախ խոսում են այն մասին, թե ինչպես են կատակներն օգնում հաղթահարել հուզական դժվարությունները, իսկ տղամարդիկ՝ հումորի սոցիալական գործառույթի մասին՝ որպես ընկերությունն ամրապնդելու և հավաքական կապերը պահպանելու միջոց: Ընդ որում, կանայք ավելի հաճախ են նշել, որ կատակները կարող են վտանգավոր լինել, եթե ուղղված են մարդկանց, այլ ոչ թե իրավիճակներին:

Գիտնականներն ընդգծում են, որ հումորը բարդ և բազմակողմանի երևույթ է: Այն կարող է լինել աջակցող և ամրապնդող, բայց երբեմն դժվարություններ է առաջացնում, եթե կատակները չեն հասկացվում կամ սխալ են ընկալվում: