Մասնագետների նախնական գնահատականներով՝ 2026 թվականը Հայաստանում բավական ջրառատ տարի կլինի։ Այս մասին նշել է ՀՀ շրջակա միջավայրի նախարարության Հիդրոմետեորոլոգիայի եւ մոնիթորինգի կենտրոնի տնօրեն Լեւոն Ազիզյանը, որը ներկայացրել է հիդրոօդերեւութաբանական պայմանների մանրամասն վերլուծությունը եւ առաջիկա սեզոնի կանխատեսումները։

Նրա խոսքով՝ գարնանային վարարումների ձեւավորումն ուղղակիորեն կախված է նոյեմբեր-մարտ ամիսների եղանակային պայմաններից, ինչպես նաեւ ապրիլ-հունիս ամիսների կանխատեսումներից։ «2025 եւ 2026թթ․ նշանավորվել են մի շարք անոմալ հիդրոօդերեւութաբանական ցուցանիշներով»,- նշել է նա։

Օրինակ՝ 2025թ․ նոյեմբերը 1935 թվականից ի վեր դիտարկումների ողջ ժամանակահատվածում ամենատաք եւ ամենաչոր ամիսներից մեկն էր։ Մյուս կողմից՝ 2026թ․ փետրվարը ռեկորդային տաք էր. օդի միջին ջերմաստիճանը կազմել է մոտ +0.1°C, գրեթե 5 աստիճանով բարձր նորմայից։ Ամսվա ընթացքում գրանցվել են նաեւ առատ տեղումներ՝ հասնելով նորմայի 206 տոկոսին, ինչն այն դարձնում է գրանցված երրորդ ամենախոնավ փետրվարը դիտարկումների պատմության ընթացքւոմ։

Մարտը նույնպես չափազանց առատ էր տեղումներով՝ ամենաթացը 1935 թվականից ի վեր։ Տեղումները գրեթե կրկնակի գերազանցել են նորման։ Ընդհանուր առմամբ, ձմեռը բնութագրվեց տեղումների ավելացմամբ, որն արդեն իսկ զգալի դրական ազդեցություն ունի երկրի ջրային ռեսուրսների վրա։

Ազիզյանը մասնավորապես անդրադարձել է ձյան ծածկույթի հետ կապված իրավիճակին։ Նրա խոսքով՝ հունվարին ձյունը ծածկել է գրեթե ամբողջ հանրապետությունը, դրա խորությունը գերազանցել է նորման միջինը 30 տոկոսով, իսկ որոշ շրջաններում՝ զգալիորեն ավելի։ «Օրինակ՝ Ապարանում ձյան ծածկույթը հասել է նորմայի 172 տոկոսին, Գավառում՝ 204 տոկոսին, իսկ Ամբերդում՝ 163 տոկոսին»,- նշել է նա։

Մարտին ձյունը հիմնականում մնացել է բարձրլեռնային շրջաններում՝ 1 700 մետրից բարձր։ Արագածի օդերեւութաբանական կայանում ձյան հաստությունն այժմ կազմում է 311 սմ, ինչը 122 սմ-ով ավելի է, քան նախորդ տարվա նույն ժամանակահատվածում։

Ինչ վերաբերում է առաջիկա ամիսներին, ապրիլ-հունիսին տեղումների քանակը կանխատեսվում է նորմային մոտ։ Ապրիլին ջերմաստիճանը կանխատեսվում է նորմայից մի փոքր ցածր, իսկ մայիսին եւ հունիսին՝ նորմայից մի փոքր բարձր։

Հաշվի առնելով դիտարկված եւ կանխատեսված բոլոր գործոնները՝ Ազիզյանն ընդգծել է, որ 2026թ․ գարնանային վարարումների մակարդակը կտատանվի նորմայի 100-130 տոկոսի սահմաններում, իսկ որոշ շրջաններում կարող է հասնել 140-160 տոկոսի։ Վեգետացիոն շրջանը նույնպես, կանխատեսվում է, որ ջրով լավ ապահովված կլինի՝ երկարաժամկետ միջինի 100-120 տոկոսի սահմաններում։ Այսպիսով, կանխատեսումները ցույց են տալիս ջրային բարենպաստ իրավիճակ, որը կարող է էական դեր խաղալ ինչպես գյուղատնտեսության, այնպես էլ երկրի ջրային ռեսուրսների ընդհանուր կառավարման համար։