Հյուսիսային Կորեայի հրթիռաշինության գլխավոր վարչությունը փորձարկել է «Հվասոնպխո-11րա» տեսակի արդիականացված մարտավարական բալիստիկ հրթիռները։ Այս մասին հայտնում է Կորեայի կենտրոնական հեռագրական գործակալությունը (ԿԿՀԳ)։

Փորձարկումներին ներկա են եղել երկրի առաջնորդ Կիմ Չեն Ընը և այլ բարձրաստիճան զինվորականներ։ Արձակված հինգ հրթիռները խոցել են 136 կիլոմետր հեռավորության վրա գտնվող թիրախները։ Ըստ գործակալության՝ հարվածն իրականացվել է 12,5–13 հեկտար տարածքի վրա և ունեցել է խոցման բարձր ճշգրտություն։ Փորձարկման նպատակը բեկորային-ֆուգասային մարտագլխիկների հնարավորությունների ստուգումն է։

Հաղորդվում է, որ Կիմ Չեն Ընը գոհ է մնացել արդյունքներից և բարձր է գնահատել այն մասնագետների աշխատանքը, որոնք հինգ տարի շարունակ զբաղվել են հրթիռի մարտագլխիկի մշակմամբ։

Ավելի վաղ՝ ապրիլի 9-ին, Հյուսիսային Կորեան արդեն հայտնել էր ցրվող մարտագլխիկով մարտավարական հրթիռի և էլեկտրամագնիսական զենքի համակարգի փորձարկումների մասին։ Տարեսկզբին իրականացվել էին նաև գերձայնային հրթիռների արձակումներ, որոնք, ըստ Փհենյանի հայտարարության, հաջողությամբ խոցել են Արևելյան ծովում տեղակայված թիրախները։