Նախընտրելի
Լեհաստանում տեղական ընկերություններից մեկը տուգանվել է 20 միլիոն զլոտիով (մոտ 5,5 միլիոն դոլար)՝ դեպի Ռուսաստան շքեղ դասի ավտոմեքենաների մատակարարման հետ կապված Եվրամիության պատժամիջոցները խախտելու համար։ Այս մասին հայտնել են երկրի կառավարությունից։
Ըստ լեհական իշխանությունների՝ Բելառուսի քաղաքացիների կողմից ղեկավարվող ընկերությունը 2022-2023 թվականներին Արևմտյան Եվրոպայում գնել է պրեմիում դասի մեքենաներ և դրանք Լեհաստանի, Լիտվայի ու Բելառուսի տարածքով տեղափոխել Ռուսաստան։
Ընդհանուր առմամբ հայտնաբերվել է BMW, Audi, Mercedes, Lamborghini, Porsche և Bentley մակնիշների մոտ 100 ավտոմեքենա (ավելի քան 49 միլիոն զլոտի արժողությամբ)։ Լեհաստանի հարկային ծառայությունը (KAS) սա անվանել է երկրում նմանատիպ խոշորագույն դեպքերից մեկը։
Իշխանությունները հայտարարել են, որ հավաքված ապացույցները մատնանշում են պատժամիջոցների ռեժիմի շրջանցման մեջ ընկերության ղեկավարության կանխամտածված մասնակցությունը։
Վերջին ամիսներին Լեհաստանն ուժեղացրել է Ռուսաստանի դեմ ԵՄ պատժամիջոցների պահպանման նկատմամբ վերահսկողությունը՝ հաշվի առնելով տարբեր ոլորտներում սահմանափակումները շրջանցելու փորձերի մասին հաղորդումները, ներառյալ շքեղության առարկաների, տեխնիկայի և արդյունաբերական արտադրանքի մատակարարումները։
